गांवकरी
इम्पॅक्ट
लासलगाव : वार्ताहर
विंचूर-प्रकाशा महामार्गावरील लासलगाव ते विंचूरदरम्यान रस्त्यावर पडलेले जीवघेणे खड्डे आणि उघड्या पडलेल्या लोखंडी जाळ्यांबाबत दै. गांवकरीने 17 जुलै रोजी वृत्त प्रसिद्ध केले होते. या वृत्ताची सार्वजनिक बांधकाम विभागाने तातडीने दखल घेत रस्त्याच्या दुरुस्तीचे काम सुरू केले आहे.
लासलगावातील कोटमगाव चौफुली ते दत्ताजी पाटील बँकेदरम्यान काँक्रीट रस्त्याचे लोखंडी गज उघडे पडल्याने आणि मोठ्या खड्ड्यांमुळे वाहनधारकांना मनस्ताप सहन करावा लागत होता. पावसाचे पाणी साचल्याने अपघातांचा धोकाही वाढला होता. ही समस्या दै. गांवकरीने मांडल्यानंतर विभागाने तातडीने दुरुस्ती मोहीम हाती घेतली. यामुळे नागरिकांनी समाधान व्यक्त केले असले, तरी कामाच्या गुणवत्तेबाबत आता प्रश्नचिन्ह उपस्थित होत आहे. दुरुस्तीचे काम सुरू असताना ओल्या सिमेंटच्या भागाभोवती बॅरिकेड्स, संरक्षणात्मक जाळ्या किंवा कोणतेही इशारा फलक लावण्यात आले नाहीत. परिणामी, अनेक वाहने थेट ओल्या सिमेंटवरून गेल्याने तिथे चिखल झाला असून, वाहनांच्या चाकांचे ठसे उमटले आहेत. यामुळे या कामाच्या टिकाऊपणावर प्रश्न उपस्थित होत आहेत. सार्वजनिक बांधकाम विभागाने तातडीने घेतलेल्या दखलीचे स्वागत करतानाच, भविष्यात अशा कामांच्या वेळी योग्य संरक्षण व्यवस्था, वाहतूक नियंत्रण आणि दर्जा राखण्यावर भर द्यावा, अशी मागणी स्थानिक नागरिकांनी केली आहे.
Work begins to fill potholes on the Lasalgaon-Vinchur road.