बुधवारपासून यलो अलर्ट;खड्डयांमुळे नागरिक त्रस्त
नाशिक : प्रतिनिधी
सकाळी काही काळ ऊन पडून दिलासा मिळाल्यानंतर सोमवारी दुपारनंतर वातावरणात अचानक बदल झाला आणि सायंकाळी शहरासह जिल्ह्याच्या अनेक भागांत मुसळधार पावसाने हजेरी लावली. जोरदार पावसामुळे शहरातील प्रमुख रस्त्यांवर वाहतूक कोंडी झाली, तर खड्ड्यांमुळे वाहनचालकांना मोठी कसरत करावी लागली. दरम्यान, जिल्ह्यातील धरणांमध्ये 81.62 टक्के पाणीसाठा झाला असून, हवामान विभागाने बुधवार ते शुक्रवार या कालावधीसाठी यलो अलर्ट जारी केला आहे.
गेल्या 24 तासांत नाशिक शहरात 54 मिमी पावसाची नोंद झाली.
नाशिक शहराला पाणीपुरवठा करणार्‍या गंगापूर धरणात 84.85 टक्के पाणीसाठा असून, धरणातून 4,947 क्यूसेक विसर्ग सुरू आहे. होळकर पुलावरून गोदावरी नदीपात्रात 6,298 क्यूसेक पाण्याचा प्रवाह सुरू आहे. जिल्ह्यातील अनेक धरणे पूर्ण क्षमतेने भरली असून, आवश्यकतेनुसार विसर्ग सुरू ठेवण्यात आला आहे.
आळंदी, वाघाड, ओझरखेड, भावली, वालदेवी, भाम, भोजापूर, हरणबारी आणि केळझर ही धरणे 100 टक्के भरली आहेत. तसेच कादवा, दारणा, पालखेड, काश्यपी, पुणेगाव आणि इतर धरणांतूनही नियंत्रित विसर्ग सुरू आहे.
दरम्यान, सततच्या पावसामुळे शहरातील अनेक रस्त्यांवर खड्डे अधिक खोल झाले असून, वाहनचालकांना वाहने चालविताना मोठी कसरत करावी लागत आहे. प्रमुख चौक आणि मार्गांवर वाहतूक कोंडीची समस्या निर्माण झाल्याने नागरिकांना प्रवासासाठी अधिक वेळ लागत आहे. पुढील तीन दिवस पावसाची शक्यता लक्षात घेता प्रशासनाने नागरिकांना सतर्क राहण्याचे आवाहन केले आहे.
प्रमुख धरणांचा विसर्ग
गंगापूर 4,947 क्यूसेक होळकर पूल 6,298 क्यूसेक
दारणा 5,330 क्यूसेक कादवा 2,319 क्यूसेक
पालखेड 1,986 क्यूसेक भाम 1,511 क्यूसेक
आळंदी 1,262 क्यूसेक वालदेवी 1,050 क्यूसेक
काश्यपी 1,000 क्यूसेक ओझरखेड 872 क्यूसेक
भावली 822 क्यूसेक पुणेगाव 805 क्यूसेक
भोजापूर 540 क्यूसेक गौतमी गोदावरी 500 क्यूसेक
नांदूरमध्यमेश्वर बंधारा 46,227 क्यूसेक
अशी आहे स्थिती
जिल्ह्यातील एकूण जलसाठा 81.62%
गंगापूर धरणातील साठा 84.85%
शहरात 24 तासांत पाऊस 47.4 मिमी
बुधवार ते शुक्रवार यलो अलर्ट
नऊ धरणे 100 टक्के भरली
54 mm of rainfall in the city in 24 hours.