मालेगावला कोम्बिंग ऑपरेशनमध्ये 15.92 लाखांचा मुद्देमाल जप्त
मालेगाव : प्रतिनिधी
शहरातील गुन्हेगारीला वेसण घालण्यासाठी मालेगाव शहर पोलिसांनी शुक्रवारी पहाटे राबविलेल्या कोम्बिंग आणि ऑलआउट ऑपरेशनमध्ये धडक कारवाई केली.
या मोहिमेत बेकायदेशीर शस्त्रे बाळगणारे आणि प्रतिबंधित गुटखा विक्री करणारे 9 संशयितांच्या मुसक्या आवळल्या आहेत. पोलिसांच्या या कारवाईत तलवारी, सुरा, प्रतिबंधित गुटखा, 25 मोटारसायकली आणि एका रिक्षेसह तब्बल 15 लाख 92 हजार 900 रुपये रकमेचा मुद्देमाल जप्त केला आहे.
मालेगाव शहर उपविभागात शुक्रवारी (7 ऑगस्ट) पहाटे 2 ते सकाळी 8 वाजेदरम्यान ही व्यापक शोधमोहीम राबवण्यात आली. गुप्त माहितीच्या आधारे पवारवाडी, आयशानगर आणि आझादनगर पोलीस ठाण्यांच्या हद्दीत ठिकठिकाणी छापे टाकण्यात आले.
आझादनगर पोलीस ठाणे : भारतीय शस्त्र कायद्यानुसार कारवाई करत मोहंमद तालीब मोहमद शगीर उर्फ अली (वय 24, रा. बाग-ए-महंमद) आणि शदाब अंजुम अलताफ अहमद उर्फ छोटे (वय 22, रा. अयुबी चौक, इस्लामपुरा) या दोघांना अटक केली. त्यांच्याकडून 10 तलवारी आणि एक मोटारसायकल जप्त करण्यात आली.
पवारवाडी पोलीस ठाणे : 11 हजार कॉलनी परिसरात कारवाई करत समद खान हनिफ खान याच्याकडून एक तलवार, तर शेख अकबर अब्दुल अजीज (वय 35) याच्याकडून एक सुरा जप्त करण्यात आला. तसेच, बंदी असलेला गुटखा विक्रीप्रकरणी ताज खान सलामत खान ( रुपये 10,448 चा विमल गुटखा), सलीम बेग मन्नान बेग (रुपये 14,400 चा डायरेक्टर गुटखा) आणि कलीम खान सलीम खान (वय 26, रुपये 8,748 चा गुटखा) या तिघांना ताब्यात
घेण्यात आले.
आयशानगर पोलीस ठाणे : आयशानगर हद्दीत तबरेज शेख गणी (रा. आयशानगर चौक) आणि रेहान अहमद मो. हारून (वय 44, रा. नवीन इस्लामपुरा) यांच्याकडून 10,448 रुपये किमतीचा विमल गुटखा आणि एक मोटारसायकल हस्तगत केली. या मोहिमेत पवारवाडी ठाण्यात 5, आयशानगर ठाण्यात 1 आणि आझादनगर ठाण्यात 1 असे एकूण 7 गुन्हे नोंदवून 9 संशयितांना अटक केली आहे. पोलिसांनी 25 दुचाकी, 1 रिक्षा, शस्त्रे व गुटखा असा एकूण 15.92 लाखांचा ऐवज जप्त केला असून, 14 संशयितांची झाडाझडती घेतली. ही धडक मोहीम नाशिक ग्रामीणचे पोलीस अधीक्षक डॉ. डी. एस. स्वामी, अतिरिक्त पोलीस अधीक्षक सूरज गुंजाळ व सहायक पोलीस अधीक्षक सिद्धार्थ बारवाल यांच्या मार्गदर्शनाखाली पार पडली. कारवाईत पोलीस निरीक्षक सानप, राहुल खताळ, संजय सूर्यवंशी, प्रतापसिंग बहुरे, संदीप पाटील, दीपक जाधव, संदीप घुगे, सहायक पोलीस निरीक्षक आनंदा माळी यांच्यासह 22 दुय्यम अधिकारी आणि 154 पोलीस अंमलदारांच्या पथकाने
सहभाग घेतला.
9 detained with swords and gutkha