चांदवडच्या मुलींच्या वसतिगृहात बिबट्याचा शिरकाव
चांदवड : वार्ताहर
येथील ऐतिहासिक कालिकादेवी लेणीच्या पायथ्याशी असलेल्या शासकीय आदिवासी मुलींच्या वसतिगृहात शुक्रवारी (दि. 7) मध्यरात्री दोनच्या सुमारास बिबट्याने थेट संरक्षक भिंत ओलांडून आत प्रवेश केला. वसतिगृहाच्या मुख्य दारासमोर बसलेल्या कुत्र्याची अवघ्या काही सेकंदांत शिकार करून बिबट्या पसार झाला. हा थरारक प्रकार सीसीटीव्ही कॅमेर्‍यात कैद झाला असून, या घटनेमुळे वसतिगृहातील विद्यार्थिनींमध्ये प्रचंड भीतीचे वातावरण पसरले आहे.
सीसीटीव्हीत कैद झाला थरार
मध्यरात्रीच्या शांततेत बिबट्या अत्यंत दबा धरून आवारात शिरला. दाराजवळ बसलेल्या कुत्र्याला क्षणाचाही विलंब न लावता जबड्यात पकडून त्याने तिथून धूम ठोकली. वसतिगृहातील एकमेव सुस्थितीत असलेल्या सीसीटीव्ही कॅमेर्‍यात हा संपूर्ण घटनाक्रम स्पष्ट दिसला आहे.
परिसरात बिबट्याचा मुक्त संचार असून, आम्हाला दररोज रात्री त्याच्या डरकाळ्या ऐकू येतात, अशी भीतिदायक माहिती वसतिगृहातील विद्यार्थिनींनी दिली. आतापर्यंत बिबट्या वसतिगृहाच्या बाहेरच असायचा; परंतु आता त्याने थेट आवारात प्रवेश केल्याने विद्यार्थिनींच्या सुरक्षेचा गंभीर प्रश्न निर्माण झाला आहे. रात्रीच्या वेळी बाहेर पडणेही आता धोक्याचे
बनले आहे.
पिंजरा लावण्याची मागणी
या घटनेनंतर वसतिगृहाच्या सुरक्षेचा प्रश्न ऐरणीवर आला आहे. प्रशासनाने खालील तातडीच्या उपाययोजना कराव्यात, अशी जोरदार मागणी केली जात आहे. वसतिगृहाच्या संरक्षक भिंतीवर तत्काळ तारेचे कुंपण घालावे. परिसरात अंधार असल्याने बिबट्याला लपण्यास सोपे जाते, त्यामुळे संपूर्ण आवारात प्रखर दिव्यांची सोय करावी. वनविभागाने या घटनेची गांभीर्याने दखल घेऊन परिसरात पिंजरा लावून बिबट्याला तात्काळ जेरबंद करावे.
‘He’ crept in stealthily, picked up the dog, and made off!