तांत्रिक त्रुटी दुरुस्त करून याचिका पुन्हा दाखल करण्याचे सर्वोच्च न्यायालयाचे निर्देश
नवी दिल्ली : प्रतिनिधी
काँग्रेस नेते राहुल गांधी यांनी निवडणूक आयोगाच्या कार्यपद्धती आणि विविध निर्णयांविरुद्ध
सर्वोच्च न्यायालयात दाखल केलेल्या याचिकेच्या सुनावणीपूर्वीच एक तांत्रिक अडचण निर्माण झाली आहे. सर्वोच्च न्यायालयाच्या रजिस्ट्रीला प्राथमिक चौकशीदरम्यान या याचिकेत एकूण 14 त्रुटी आढळल्या आहेत. नियमानुसार जोपर्यंत या त्रुटी दूर होत नाहीत तोपर्यंत ही याचिका खंडपीठासमोर सुनावणीसाठी सूचीबद्ध केली जाऊ शकत नाही.
नोंदणी कार्यालयाने अधोरेखित केलेल्या 14 त्रुटींपैकी, सर्वांत धक्कादायक बाब म्हणजे अर्जासाठी निर्धारित केलेले न्यायालयीन शुल्क 220 ने कमी भरण्यात आले होते. याव्यतिरिक्त प्रतिज्ञापत्राचा चुकीचा नमुना, पृष्ठ क्रमांकातील चुका, कागदपत्रांची चुकीची पडताळणी आणि काही आवश्यक सह्यांचा अभाव यांसारख्या प्रक्रियात्मक चुका निदर्शनास आल्या आहेत. न्यायालय प्रशासनाने वकिलांच्या पथकाला नियमांनुसार कागदपत्रांमध्ये सुधारणा करण्यास सांगितले आहे.
सर्वोच्च न्यायालयाच्या नियमांनुसार, याचिकाकर्त्या पक्षाला या सर्व प्रक्रियात्मक त्रुटी विहित मुदतीत दूर करून अर्ज पुन्हा दाखल करावा लागेल. या सर्व तांत्रिक आक्षेपांचे निराकरण झाल्यानंतरच, सर्वोच्च न्यायालयाची रजिस्ट्री त्याला कायदेशीर डायरी क्रमांक देईल आणि सुनावणीची तारीख निश्चित करेल. काँग्रेसच्या कायदेशीर पथकाने या सर्व त्रुटी दूर करून लवकरात लवकर सुनावणीसाठी अर्ज तयार करण्याची प्रक्रिया सुरू केली आहे.
राहुल गांधींना मोठा दिलासा
काँग्रेस नेते आणि लोकसभेतील विरोधी पक्षनेते राहुल गांधी यांना
सर्वोच्च न्यायालयाकडून मोठा दिलासा मिळाला आहे. पंतप्रधान नरेंद्र मोदी यांच्याबद्दल केलेल्या चौकीदार चोर है, चोरों के सरदार (कमांडर-इन-थीफ) या वक्तव्याप्रकरणी सुरू असलेल्या मानहानी खटल्याच्या सुनावणीला सुप्रीम कोर्टाने मंगळवारी (दि. 13) स्थगिती दिली आहे. हे प्रकरण 2018 च्या राफेल लढाऊ विमान कराराच्या वादाशी संबंधित आहे.
आंदोलनावर पोलिसांची कारवाई
दिल्लीत झालेल्या इंडिया आघाडीच्या ’मार्च फॉर डेमोक्रसी’ आंदोलनावरून दिल्ली पोलिसांनी कठोर कारवाई केली आहे. विनापरवानगी मोर्चा काढणे, पोलीस बॅरिकेड्स तोडणे आणि मिनी ट्रकने बॅरिकेड्सला धडक देण्याप्रकरणी पोलिसांनी एकूण चार एफआयआर दाखल केल्या आहेत. यात विरोधी पक्षनेते राहुल गांधी यांच्यासह अनेक नेत्यांची नावे आहेत. 12 ऑक्टोबरला मुख्य निवडणूक आयुक्त ज्ञानेश कुमार यांच्या राजीनाम्याच्या आणि मतदार यादीतील एसआयआर प्रक्रियेतील कथित घोटाळ्याच्या विरोधात इंडिया आघाडीने मोठा मोर्चा काढला होता. बाराखंबा रोड ते सुप्रीम कोर्टापर्यंत हा मोर्चा निघाला होता. या मोर्चात राहुल गांधी, मल्लिकार्जुन खर्गे, ममता बॅनर्जी, अखिलेश यादव, तेजस्वी यादव व सुप्रिया सुळे यांच्यासह जवळपास सर्व मोठे नेते सहभागी झाले होते.
सर्वांच्या एकजुटीने आंदोलन सुरूच राहील
कथित मतचोरी आणि निवडणूक आयोगाच्या कारभाराविरोधात दिल्लीत वातावरण चांगलेच तापले आहे. परवाच्या ’मार्च फॉर डेमोक्रसी’नंतर राहुल गांधी यांनी आपल्या निवासस्थानी इंडिया आघाडीच्या नेत्यांसाठी चहापान बैठकीचे आयोजन केले होते. त्यानंतर झालेल्या संयुक्त पत्रकार परिषदेत थेट पंतप्रधान मोदी आणि मुख्य निवडणूक आयुक्त ज्ञानेश कुमार यांना लक्ष्य करण्यात आले. मतचोरीचा प्लॅन उद्ध्वस्त करणार, असा निर्धार इंडिया आघाडीच्या नेत्यांनी व्यक्त केला. राहुल गांधी यांनी पोस्ट करत म्हटले आहे की, लोकशाहीच्या रक्षणासाठीच्या या जनआंदोलनात आपली सर्वांची एकजूट आहे आणि हे आंदोलन सुरूच राहील.
14 defects in Rahul Gandhi’s petition.