सुचिता पाटील यांनी निवडली यशाची वेगळी वाट
♣ नवदुर्गां ♣
नाशिक : प्रतिनिधी
महिला आता विविध क्षेत्रांत आपल्या कर्तृत्वाचा ठसा उमटवत आहेत. पारंपरिक चौकटीपलीकडे जाऊन करिअरची वेगळी वाट निवडणार्‍या या नवदुर्गांपैकी एक म्हणजे, नाशिकच्या सुचिता पाटील. वाणिज्य शाखेचे शिक्षण घेतलेल्या सुचिता यांनी रेमॉन कॅफेच्या माध्यमातून व्यावसायिक क्षेत्रात स्वतःची ओळख निर्माण केली आहे. एका वडिलांच्या त्यागातून त्यांना मिळालेली प्रेरणा आणि त्यातून साकारलेली पन्नास रुपयांच्या पिझ्झ्याची संकल्पना त्यांच्या प्रवासाचे वैशिष्ट्य ठरली आहे.
सुमारे सहा वर्षांपूर्वी सुरू झालेल्या या प्रवासात सुचिता यांना राहुल सिकसुरे आणि कुटुंबीयांची मोलाची साथ लाभली. एके दिवशी एक वडील आपल्या मुलाला घेऊन कॅफेमध्ये आले. मुलाला दीडशे रुपयांचा पिझ्झा खायचा होता. मात्र, वडिलांकडे केवळ शंभर रुपये होते. त्यामुळे त्यांनी मुलाला पन्नास रुपयांचा बर्गर घेण्यास समजावण्याचा प्रयत्न केला. हा प्रसंग पाहून सुचिता आणि राहुल यांनी त्या मुलाला शंभर रुपयांत पिझ्झा देण्याचे ठरवले. मात्र, या प्रसंगाने सुचिता यांच्या मनावर खोलवर ठसा उमटला. मुलाला पिझ्झा मिळाल्यानंतर त्या वडिलांनी स्वतः त्यातील एक घासही खाल्ला नाही. मुलाने पोटभर पिझ्झा खावा, हीच त्यांची इच्छा होती. मुलाच्या आनंदासाठी स्वतःची इच्छा बाजूला ठेवणार्‍या वडिलांचा त्याग सुचिता यांना भावला. त्यातूनच प्रत्येकाला परवडणार्‍या दरात पिझ्झा उपलब्ध करून देण्याची कल्पना त्यांच्या मनात आली.
ही संकल्पना प्रत्यक्षात आणण्यासाठी त्यांनी पुण्यात जाऊन खाद्यपदार्थ निर्मितीविषयक अभ्यासक्रम पूर्ण केला. कौशल्य वाढवत आणि कुटुंबाच्या पाठबळावर आपल्या ध्येयाच्या दिशेने वाटचाल करत त्या 2025 पासून रेमॉन कॅफेमध्ये अवघ्या पन्नास रुपयांत पिझ्झा उपलब्ध करून देत आहेत. परवडणार्‍या दरात पिझ्झा मिळत असल्याने कॅफेमध्ये आबालवृद्धांंसह सर्वांचीच गर्दी होत असल्याने सुचिता यांच्या कॅफेच्या व्यवसायाला नवीन भरारी मिळाली आहे.
एका भावनिक अनुभवातून जन्माला आलेली ही संकल्पना सुचिता यांच्या जिद्दीची, कल्पकतेची आणि माणुसकीची ओळख बनली आहे. स्वतःचे स्वप्न साकारतानाच इतरांच्या आनंदाचाही विचार करणार्‍या सुचिता यांची व्यावसायिक वाटचाल उद्योजिकांसाठी प्रेरणादायी ठरत आहे.
A business takeoff from a fifty-rupee pizza