मयूरच्या मृत्यूप्रकरणी सदोष मनुष्यवधाचा गुन्हा

साथीदाराने मद्यधुंद अवस्थेत चालकाला चिथावले

पंचवटी : प्रतिनिधी
पेठ रोडवरील तवली फाटा परिसरात रविवारी दुपारी एका भरधाव स्कॉर्पिओने 15 वर्षीय मयूर भोये यास चिरडल्याची धक्कादायक घटना घडली होती. त्याच्या मृत्यूस कारणीभूत ठरलेले चालक आणि त्याचा साथीदार दोघेही मद्यधुंद अवस्थेत होते. याप्रकरणी म्हसरूळ पोलिसांनी दोघांविरुद्ध सदोष मनुष्यवधाचा गुन्हा दाखल केला आहे.
पोलिसांनी दिलेल्या माहितीनुसार, सुरेश देवराम भोये (40, रा. लक्ष्मीनगर, तवली फाटा) यांचा मुलगा मयूर हा रविवारी (दि. 22) दुपारी 4.15 वाजेच्या सुमारास राज बेकरीसमोरील रस्त्याच्या कडेला उभा होता. यावेळी दिंडोरीहून नाशिकच्या दिशेने येणारी स्कॉर्पिओ (एमएच15-केके 6464) भरधाव आली. चालक अमोल रमेश ढगे (रा. रासेगाव) आणि त्याचा साथीदार गणेश उत्तम पेलमहाले (रा. चाचडगाव) हे दोघे गाडीतच दारू पीत होते.
पोलीस तपासात समोर आले की, आरोपी गणेश पेलमहाले याने दारूच्या नशेत चालक अमोलला गाडी अधिक वेगाने चालवण्यासाठी चिथावणी दिली. यामुळे अमोलने रस्त्याच्या परिस्थितीचा विचार न करता वाहन चुकीच्या दिशेला नेले आणि थेट रस्त्याखाली उभ्या असलेल्या मयूरला धडक दिली. ही धडक इतकी भीषण होती की, मयूरचा गंभीर जखमी होऊन जागीच मृत्यू झाला. याप्रकरणी म्हसरूळ पोलीस ठाण्यात गुन्हा दाखल करण्यात आला आहे. वरिष्ठ पोलीस निरीक्षक अंकुश चिंतामण यांच्या मार्गदर्शनाखाली पोलीस उपनिरीक्षक गजानन जोशी या प्रकरणाचा पुढील तपास करत आहेत.

a-case-of-culpable-homicide-has-been-filed-in-the-death-of-mayur