अंकाई शिवारात ट्रकच्या धडकेत दोन दुचाकीस्वार ठार

येवला प्रतिनिधी
तालुक्यातील अंकाई शिवारात येवला-मनमाड राज्यमहामार्गावर दुचाकी आणि ट्रक यांच्या अपघातात दुचाकीवरील दोन जण जागीच ठार झाले आहेत. याबाबत तालुका पोलीस सूत्रांनी दिलेली माहिती अशी की, काल सायंकाळी 7 वाजेच्या सुमारास येवला-मनमाड महामार्गावर ट्रक व मोटारसायकल यांच्यात भीषण अपघात झाला. येवला बाजूने मनमाड दिशेला जात असलेला ट्रक (क्रमांक आरजे 09 जीबी 3518) आणि येवल्याच्या दिशेला येत असलेली मोटारसायकल (क्रमांक एमएच 15 सीएच 1240) यांच्यात अपघात झाला. ट्रकची धडक इतकी जोरात होती की, दुचाकीचे प्रचंड नुकसान होऊन दोघांचा मृत्यू झाला. अद्याप दोन्ही मृतांची ओळख पटली नसून, ओळख पटविण्याचे आव्हान येवला तालुका पोलिसांपुढे आहे. कोणाला काही माहिती असल्यास पोलिसांसोबत संपर्क करण्याचे आवाहन करण्यात आले आहे. दरम्यान, या अपघाताची माहिती स्थानिक समाजसेवक अल्केश कासलीवाल, राजूसिंग परदेशी आदींना समजताच त्यांनी तातडीने सहकार्‍यांच्या मदतीने घटनास्थळी धाव घेत मदतकार्य केले. यावेळी दोन्ही मृतदेह खासगी रुग्णवाहिकांद्वारे उपजिल्हा रुग्णालय येथे आणण्यात आले असून, ट्रकचालकाला पोलिसांनी ताब्यात घेतल्याची माहिती मिळाली असून, रात्री उशिरा गुन्हा नोंदविण्याचे काम सुरू होते