प्रभाग सातमध्ये भाजपाचे वर्चस्व

शिवसेना शिंदे गटाचे अजय बोरस्ते विजयी, हिरेंना धक्का

नाशिक ः प्रतिनिधी
नाशिक महानगरपालिकेच्या सार्वत्रिक निवडणुकीत (2026) प्रभाग क्रमांक 7 मध्ये चुरशीची लढत पाहायला मिळाली. या प्रभागात भारतीय जनता पक्षाने तीन जागांवर विजय मिळवत आपले वर्चस्व सिद्ध केले, तर शिवसेनेने (शिंदे गट) एका जागेवर यश मिळवले.
शहरात 31 प्रभागांतील 122 जागांसाठी दि. 15 जानेवारी 2026 रोजी निवडणूक पार पडली. मतमोजणी शुक्रवारी (दि.16) करण्यात आली. 7, 12 व 24 या प्रभागांची मतमोजणी भाभानगर येथील दादासाहेब गायकवाड सभागृहात झाली.
या मतमोजणीत भाजपचे सुरेशअण्णा पाटील यांनी दहा हजार 695 मते मिळवून प्रतिस्पर्धी राजेंद्र सूर्यवंशी यांचा आठ हजार 279 मतांनी पराभव केला. महिलांच्या जागेवर भाजपच्या हिमगौरी आहेर-आडके यांनी 11 हजार 184 मते मिळवत शिवसेनेच्या रोहिणी शिरसाठ यांच्यावर नऊ हजार 992 मतांनी मात केली.
तिसर्‍या जागेवर भाजपच्या स्वाती भामरे यांनी 11 हजार 740 मते मिळवून शिवसेनेच्या वंदना रकिबे यांचा सात हजार 062 मतांनी पराभव केला. शिवसेनेला (शिंदे गट) या प्रभागात दिलासा देणारा विजय अजय बोरस्ते यांनी मिळवला. त्यांनी 13 हजार 022 मते घेत भाजपचे योगेश हिरे यांचा सहा हजार 920 मतांनी पराभव करीत शिवसेनेची एकमेव जागा कायम राखली. प्रभाग 7 मध्ये प्रसाद मंगल कार्यालय, थत्तेेनगर, गोळे कॉलनी, डिसूझा कॉलनी, पोलीस हेडक्वार्टर, पंडित कॉलनी, पाटील लेन, रुंग्ठा हायस्कूल परिसर, घारपुरे घाट, जेहान सर्कल, कुसुमाग्रज गार्डन, सप्तशृंंगी कॉलनी, डोंगरे वसतिगृह परिसर, अशोक स्तंभ एवढी परिसराची व्याप्ती आहे.
प्रभाग क्रमांक 7 मधील या निकालातून मतदारांचा कल स्पष्टपणे भाजपच्या बाजूने झुकलेला दिसला. निकाल जाहीर होताच विजयी उमेदवारांच्या समर्थकांनी जल्लोेष करत आनंद व्यक्त केला.