बोलणे बंद केल्याने प्रियकराचा प्रेयसीवर हल्ला

नाशिकरोडला संशयिताला अटक

नाशिकरोड : प्रतिनिधी

प्रेयसीने प्रियकराशी बोलणे व भेटणे बंद केल्याने याचा प्रियकराला राग आल्याने संतप्त झालेल्या प्रियकराने प्रेयसीला मारहाण करून एका धारदार शस्त्राने तिच्यावर हल्ला करून जखमी केल्याचा प्रकार देवी चौक , नाशिकरोड परिसरात घडला . याप्रकरणी प्रेयसीच्या तक्रारीनंतर नाशिक रोड पोलिसांनी प्रियकराला अटक केली आहे .

पीडित तरुणी ही जेलरोड परिसरात राहणारी असून , प्रियकरसुद्धा जेलरोड परिसरात राहतो . शुभम अरुण घोलप असे प्रियकराचे नाव असून , त्याची प्रेयसी ही नाशिकरोड परिसरातील देवीचौकातील एका ज्वेलर्सच्या दुकानात काम करते . गेल्या पाच ते सहा वर्षांपासून दोघांचे एकमेकांवर प्रेम आहे . परंतु , गेल्या काही दिवसांपासून प्रेयसी ही

शुभमबरोबर बोलत नव्हती तसेच त्याला भेटतसुद्धा नव्हती . त्यामुळे शुभमचा राग अनावर झाला व त्याने सदर प्रेयसीला देवीचौकात गाठले . त्यानंतर दोघांचे भांडण झाले . भांडणानंतर प्रियकर शुभम घोलप याने तिला मारहाण केली . जवळ असलेल्या कटरसारख्या धारदार शस्त्राने तिच्या डाव्या हाताच्या मनगटावर हल्ला करून जखमी केले .

या घटनेनंतर प्रेयसीने तातडीने पोलीस स्टेशन गाठले व शुभम घोलप विरुद्ध तक्रार दाखल केली . या तक्रारीनंतर पोलिसांनी तातडीने शुभमला अटक केली असून , पुढील तपास वरिष्ठ पोलीस निरीक्षक अनिल शिंदे यांच्या मार्गदर्शनाखाली पोलीस निरीक्षक गणेश नायदे , सहाय्यक पोलीस निरीक्षक शेळके , हवालदार हिरे करीत आहेत .

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.