मालेगावला बस-ट्रकच्या अपघातात प्रवासी जखमी

मालेगाव : येथील राष्ट्रीय महामार्गावरील फाउंटन हॉटेलजवळ रविवारी (दि. 8) दुपारी साडेतीनच्या दरम्यान राज्य परिवहन महामंडळाची बस व ट्रक यांच्यात भीषण अपघात झाला. त्यात बसचालकासह अनेक प्रवासी गंभीर जखमी झाले आहेत. प्राथमिक माहितीनुसार पिंपळगाव आगाराची बस (एमएच 14 बीटी 3327) नाशिकहून मालेगावकडे येत होती. यावेळी ट्रक (आरजे 11 जीसी 3608) फाउंटन हॉटेलसमोरील महामार्गावर अचानक दुभाजक ओलांडत असताना समोरासमोर बसला जोरात धडक दिली. अपघाताचा आवाज होताच घटनास्थळी नागरिकांनी धाव घेत तत्काळ मदतकार्य सुरू केले. बसमधील जखमींना रुग्णवाहिकेतून मालेगाव येथील रुग्णालयात हलवले. अपघात इतका भीषण होता की बस आणि ट्रक चालकाच्या केबीनचा चक्काचूर झाला. अपघातात बसचालकासह अनेक प्रवासी गंभीर जखमी झाले आहेत. दरम्यान, महामार्गावरील दुभाजकाजवळ अनेक वाहनचालक अयोग्य पद्धतीने वाहने चालवत असल्याने अपघात वाढ होत आहे.