वन विभाग-पोलिसांची शोधमोहीम निष्फळ
नाशिक : प्रतिनिधी
भोंसला महाविद्यालय परिसरात बिबट्या पकडल्यानंतर शुक्रवारी (दि. 12) पहाटे गडकरी चौक परिसरात बिबट्या दिसल्याने नागरिकांत घबराट पसरली आहे. वन विभाग आणि पोलिसांनी रात्रभर शोधमोहीम राबवली. मात्र, बिबट्याने गुंगारा दिला.
पहाटे 4.30 वाजता रात्रपाळीच्या कर्तव्यावर असणार्‍या पोलीस अंमलदारांना बिबट्या दिसला. तत्काळ वनपरिक्षेत्र अधिकारी, नाशिक शहर पोलिसांचे श्वानपथक (गुगल श्वान), वन्यप्राणी बचाव पथक व रेस्क्यू नाशिक डिव्हिजनचे पथक घटनास्थळी दाखल झाले.
सीसीटीव्ही फुटेजची तपासणी केली असता बिबट्याचा वावर स्पष्ट दिसल्याने अधिकार्‍यांनी तत्काळ शोधमोहीम हाती घेतली. थर्मल ड्रोनच्या मदतीने तसेच श्वानपथकासह विशेष पोलीस महानिरीक्षक कार्यालय, शासकीय निवासस्थान परिसर, नाशिक शहर पोलीस उपायुक्त कार्यालय परिसर आणि मुख्य वनसंरक्षक (प्रादेशिक) कार्यालय या संपूर्ण भागात तपास करण्यात आला. मात्र, दीर्घ शोधमोहिमेनंतरही बिबट्या सापडला नाही. परिसरात फिरताना दक्षता घ्यावी. विशेषत: लहान मुलांची काळजी घ्यावी. कुठेही बिबट्याचा किंवा इतर वन्यप्राण्यांचा वावर आढळल्यास तत्काळ वन विभागाशी संपर्क साधावा, असे आवाहन वन विभागाने केले आहे.