ईदच्या खरेदीसाठी मध्यरात्रीपर्यंत बाजारपेठांमध्ये गर्दी

जुना नाशिक : वार्ताहर
रमजान महिन्यातील बावीस उपवास पूर्ण झाल्याने ईदच्या खरेदीस वेग आला आहे. या पार्श्वभूमीवर जुने नाशिक परिसरातील बाजारपेठा अक्षरशः ओसंडून वाहत आहेत. भद्रकाली, दूधबाजार, बागवानपुरा, फाळके रोड, मौलाबाबा चौक, फुले मार्केट, मुलतानपुरा, वडाळारोड आदी परिसरात रात्री उशिरापर्यंत खरेदीसाठी नागरिकांची मोठी गर्दी दिसून येत आहे.
ईदच्या तयारीला सध्या वेग आला आहे. महिलांसाठी नवनवीन पद्धतीचे पंजाबी ड्रेसेस, शरारा, गरारा आणि डिझायनर साड्यांची मोठी दुकाने थाटली आहेत. पुरुषांसाठी पठाणी सूट, कुर्ता तसेच विविध प्रकारच्या टोप्यांनी बाजारपेठ सजली आहे. महिलांसाठी विविध प्रकारच्या बांगड्या, मेहंदी आणि दागिने उपलब्ध आहेत. तसेच सुगंधी अत्तरांचे स्टॉल्स ठिकठिकाणी लागले आहेत. याशिवाय, सुका मेवा, खजूर आणि शिरखुर्मासाठी लागणारी शेवयांची दुकानेही गजबजलेली दिसून येत आहेत. दरम्यान, गर्दीवर नियंत्रण ठेवण्यासाठी भद्रकाली पोलीस ठाण्याच्या वतीने सर्वत्र चोख पोलीस बंदोबस्त तैनात करण्यात आला आहे. तसेच वाहतूक कोंडी टाळण्यासाठी ठिकठिकाणी बॅरिकेडिंग करण्यात आली आहे.

Crowds in markets till midnight for Eid shopping