त्र्यंबकेश्वर, गंगापूर रोडवरील ड्रेनेज कामांना सुरुवात

पावसाळ्यातील समस्यांवर कायमस्वरूपी उपाय

नाशिक : अक्षय निरभवणे
नाशिक शहरातील प्रमुख आणि वर्दळीचे मार्ग असलेल्या त्र्यंबक रोड व गंगापूर रोडवर अखेर ड्रेनेजच्या कामांना सुरुवात झाली असून, या कामामुळे नागरिकांना मोठा दिलासा मिळण्याची अपेक्षा व्यक्त केली जात आहे. अनेक वर्षांपासून या रस्त्यांवर पावसाळ्यात पाणी साचणे, सांडपाणी रस्त्यावर येणे, दुर्गंधी आणि वाहतूक कोंडी यांसारख्या गंभीर समस्यांना नागरिकांना सामोरे जावे लागत होते. या पार्श्वभूमीवर महानगरपालिकेने ड्रेनेज व्यवस्था सक्षम करण्यासाठी हे महत्त्वाचे पाऊल
उचलले आहे.
त्र्यंबकेश्वर रोड आणि गंगापूर रोड हे शहराला बाहेरील भागांशी जोडणारे महत्त्वाचे रस्ते असून, दररोज हजारो वाहने या मार्गांवरून ये-जा करतात. शिक्षणसंस्था, रुग्णालये, धार्मिक स्थळे आणि व्यापारी संकुले या परिसरात असल्याने नागरिकांची सतत वर्दळ असते. मात्र, अपुर्‍या आणि जुन्या ड्रेनेज लाइन्समुळे पावसाळ्यात मोठ्या प्रमाणात पाणी साचत असल्याने वाहनचालक, पादचारी तसेच स्थानिक रहिवाशांना मोठ्या त्रासाला सामोरे जावे लागत होते.
सध्या सुरू असलेल्या कामांमध्ये रस्त्याच्या कडेला खोल खड्डे खोदून नवीन भूमिगत ड्रेनेज पाइपलाइन टाकण्यात येत आहे. मोठ्या व्यासाच्या पाइप्सचा वापर करून पावसाचे व सांडपाण्याचे योग्य नियोजन केले जाणार आहे. या कामासाठी आधुनिक यंत्रसामग्रीचा वापर करण्यात येत असून, काम वेगाने पूर्ण करण्याचा प्रशासनाचा प्रयत्न आहे. काही ठिकाणी रस्त्याचा भाग तात्पुरता बंद करून सुरक्षिततेसाठी बॅरिकेड्स आणि सूचनाफलक लावण्यात आले आहेत. महानगरपालिकेच्या अधिकार्‍यांनी दिलेल्या माहितीनुसार, ड्रेनेजचे काम पूर्ण झाल्यानंतर रस्त्याचे डांबरीकरण करण्यात येणार असून, संपूर्ण परिसर अधिक स्वच्छ, सुरक्षित आणि सुस्थितीत दिसणार आहे. त्र्यंबकेश्वर व गंगापूर रोडवरील हे ड्रेनेज काम नाशिक शहराच्या पायाभूत सुविधांच्या विकासात एक महत्त्वाचा टप्पा ठरणार असल्याचे बोलले जात आहे.

काम वेळेत पूर्ण व्हावे

काम सुरू असल्यामुळे काही प्रमाणात वाहतुकीत अडथळे येत असले तरी, नागरिकांनी हे काम शहराच्या भविष्यासाठी आवश्यक असल्याचे मान्य केले आहे. ड्रेनेजची समस्या कायमची सुटली तर पावसाळ्यात होणारा त्रास थांबेल, अशी प्रतिक्रिया स्थानिक रहिवाशांनी व्यक्त केली आहे. तसेच काम वेळेत आणि दर्जेदार पूर्ण व्हावे, अशी अपेक्षाही नागरिकांकडून व्यक्त होत आहे.

Drainage work begins on Trimbakeshwar, Gangapur Road

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.