तहानेच्या बहाण्याने घरात घुसून सोनपोत लांबवली

महिला मजुराविरोधात गुन्हा दाखल

निफाड : तालुका प्रतिनिधी
शेतीकाम करताना लागलेल्या तहानेचा गैरफायदा घेत एका महिला शेतमजुराने चक्क मालकिणीच्या घरातून सोन्याच्या पोतवर डल्ला मारल्याची धक्कादायक घटना निफाड तालुक्यातील भेंडाळी येथे घडली आहे. पाणी पिण्याच्या बहाण्याने घरात शिरून कपाटातील 1 तोळा 6 ग्रॅम वजनाचे सोन्याचे मंगळसूत्र चोरणार्‍या संशयित महिला मजुराविरोधात सायखेडा पोलीस ठाण्यात गुन्हा दाखल करण्यात आला आहे.
भेंडाळी येथील धोंडाईचा मळा शिवारात संगीता भागवत खालकर (वय 48) यांचे शेत आणि शेतातच घर आहे. 30 जून रोजी दुपारी नेहमीप्रमाणे शेतात काम सुरू होते. यावेळी औरंगपूर येथे राहणारी एक महिला मजूर तिथे काम करत होती.
दुपारी साडेतीन वाजेच्या सुमारास प्रचंड उकाड्यामुळे या संशयित महिला मजुराने संगीता खालकर यांना पाणी पिण्यासाठी घरात जात असल्याचे सांगितले. परंतु, घरात गेल्यानंतर पाण्याचा तांब्या घेण्याऐवजी या महिलेची नजर घरातील लाकडी कपाटावर पडली. तिने कपाट उघडून त्यातील 59,800 रुपये किमतीची सोन्याची पोत (मंगळसूत्र), ज्यामध्ये 124 गोलाकार मणी आणि दोन सोन्याच्या वाट्या होत्या, ती चोरून पोबारा केला.

पाच दिवसांनी चोरी उघड

चोरीचा हा प्रकार तब्बल पाच दिवसांनी लक्षात आला. यानंतर 5 जुलै रोजी रात्री सायखेडा पोलीस ठाण्यात याप्रकरणी तक्रार देण्यात आली. सायखेडा पोलिसांनी घरफोडीचा गुन्हा दाखल केला असून, या प्रकरणाचा पुढील तपास पोलीस अहिरे करत आहेत. विश्वासू मजुरानेच अशा प्रकारे हात साफ केल्याने परिसरात या घटनेची जोरदार चर्चा सुरू आहे.

Entered the house under the pretext of thirst and made off with a gold necklace.