सीबीआय अधिकारी भासवून 47 लाखांची खंडणी

सिडको : विशेष प्रतिनिधी
मुंबई येथील सीबीआय अधिकारी असल्याचेे भासवून एका नागरिकाच्या आधार कार्डचा गैरवापर झाला आहे. त्याच्या बँक खात्यांवर गुन्हे दाखल झाल्याचे सांगून त्याच्याकडून 47 लाख 87 हजार 500 रुपयांची रक्कम खंडणी म्हणून उकळण्यात आली. याप्रकरणी सायबर पोलिस ठाण्यात गुन्हा दाखल करण्यात आला.

या प्रकरणातील आरोपींनी फिर्यादीशी संपर्क साधत, ते सीबीआय मुंबईमधील अधिकारी मोहनदास असल्याचे भासवले.आरोपींनी बनावट सीबीआय लोगो असलेले पत्र पाठवून त्यात फिर्यादीचे नाव व आधार क्रमांक वापरून, त्यांच्या विरोधात मनी लॉन्ड्रिंग, ड्रग्ज ट्रॅफिकिंग व हवाला व्यवहारांचे आरोप लावले. तसेच त्यांच्या आधारकार्डचा वापर करून विविध राज्यांत बँक खाती उघडली गेल्याचे सांगण्यात आले.
खोट्या चौकशीच्या नावाखाली आरोपींनी फिर्यादीला मानसिक दबाव आणत, त्यांच्या बँक खात्यांतील रक्कम एका विशिष्ट खात्यात वर्ग करण्यास भाग पाडले. फिर्यादीला व त्यांच्या कुटुंबीयांना धोका असल्याचे सांगून त्यांना भीती दाखवण्यात आली. एकूण 47 लाख 87 हजार 500 रुपयांची रक्कम उकळण्यात आली.
याप्रकरणी सायबर पोलिस ठाण्यात गुन्हा दाखल करण्यात आला आहे. वरिष्ठ पोलिस निरीक्षक सुभाष ढवळे यांच्या मार्गदर्शनाखाली तपास सुरू आहे.