सप्तरंग स्टॉपजवळील पानटपरीला आग

पंचवटी : प्रतिनिधी
पेठरोडवरील सप्तरंग स्टॉप येथील पानटपरीला रविवारी मध्यरात्री सुमारास आग लागली. यात कुठलीही जीवितहानी झाली नाही. मात्र,पान टपरीमधील 70 ते 80 हजारांच्या मालाचे नुकसान झाले आहे. दरम्यान, अग्निशमन दलाने तत्काळ धाव घेत आग नियंत्रणात आणली.
याबाबत अधिक माहिती अशी की, आकाश धोत्रे (वय 28, रा. राजमुद्रा सोसायटी, सप्तरंग पाठीमागे, पेठरोड) याची हॉटेल घुंगरूसमोर पोपटराव पिंगळेनगर कॉर्नरजवळ पानटपरी आहे. नित्यक्रमाने शनिवारी (दि.13) रोजी दहा वाजता कामकाज उरकून पानटपरी बंद करून घरी गेला. रविवारी (दि. 14) बारा ते साडेबाराच्या दरम्यान पानटपरीत अचानक शॉर्टसर्किट झाल्याने आग भडकली. काही क्षणातच आगीचे लोट वरच्या बाजूला धडधडू लागले. एका सुजाण नागरिकाने अग्निशमन दलाला माहिती कळवली असता, तत्काळ बंब क्रमांक 3309 घटनास्थळी पोहोचला.
काही वेळातच आग नियंत्रणात आणली. या आगीत पानटपरी जळून खाक झाली. जवळपास सत्तर ते ऐंशी हजारांचे नुकसान झाले आहे. ही कामगिरी लीडिंग फायरमन संदीप जाधव, बाळू लहानगे, वाहनचालक बाळू काकडे, ट्रेनी फायरमन नीलकंठ शिंदे, अजय पाटील आदींनी बजावली.