ड्रोनचालकांनो सावधान ; नाशिक मध्ये ड्रोन उडवण्यास बंदी

नाशिक : लष्करी हद्दीत दोन वेळा ड्रोन उडाल्याच्या घटनेने एकच खळबळ उडाली असताना आता यासंदर्भात सुरक्षिततेसाठी महत्त्वाचा निर्णय घेण्यात आला आहे. एका महिन्यात एकदा नाही तब्बल दोन वेळा संवेदनशील भागात ड्रोन आढळून आल्याने नाशिकमध्ये आता ड्रोन उडवण्यावर बंदी घालण्यात आली आहे. संरक्षण विभागासह गृहविभागाने या प्रकरणाची गंभीर दखल घेतली आहे. लष्कराच्या हद्दीत दोन वेळा ड्रोनने रेकी होत असल्याचा प्रकार उघडकीस आल्यानंतर सुरक्षिततेच्या दृष्टिकोनातून हा अत्यंत महत्त्वाचा निर्णय नाशिक पोलिसांकडून घेण्यात आला आहे.