टाकेदजवळ पिकअप उलटून चार महिला जखमी

वासाळी : वार्ताहर
इगतपुरी तालुक्यातील सर्वतीर्थ टाकेद येथे ऋषीपंचमीनिमित्त आलेल्या मालेगाव येथील महिला भाविकांची टाकेद – जोशीवाडी येथे पिकअप गाडी उलटून एक महिलेचा पाय मोडला, तर तीन महिला किरकोळ जखमी झाल्या.
मालेगाव येथील (एम. एच. 15 डी. के. 7640) या पिकअपने 15 ते 20 महिला टाकेद येथील जटायू तीर्थक्षेत्री स्नान, पूजा व देवदर्शनासाठी आल्या होत्या. स्नान, पूजा व देवदर्शन घेऊन सदर भाविक महिला खेड येथील भैरवनाथाचे दर्शन घेण्यासाठी जात असताना टाकेद खुर्दच्या जोशीवाडीजवळील गायकवाड यांच्या वस्तीजवळ रस्त्याला पडलेले खड्डे व त्यातच समोरून जनावरे आल्याने त्यांना वाचवताना सदर पिकअप गाडीच्या चालकाचे नियंत्रण सुटल्याने सतत पडणार्‍या पावसामुळे सदरची पिकअप गाडी शेतात उलटून चाके वर झाली व आतील महिलांना यामुळे बराच मुक्का मार लागला. तर एका महिलेचा पोटरीजवळ पाय मोडल्याने मोठ्या प्रमाणात रक्तस्त्राव होत होता. किरकोळ जखमींना मलमपट्टी करून व पाय मोडलेल्या महिलेला ताबडतोब पुढील उपचारासाठी एस.एम.बी.टी. हॉस्पिटल धामणगाव येथे पाठविण्यात आले.
हा अपघात झाल्यानंतर त्वरित टाकेद खुर्दचे पोलीसपाटील शरद निर्मळ, सुरेश जगदाळे, गोरख जगदाळे, टाकेद बुद्रुक येथील सामाजिक कार्यकर्ते रतन नाना बांबळे, युवराज क्षीरसागर, चेतन परदेशी यांनी जेसीबी आणून गाडी सरळ करून त्यांना व अपघातग्रस्त रुग्णांना त्वरित मदत करण्यात आली.