गॅसचा तुटवडा, एस्मा कायदा लागू

सुरळीत पुरवठ्यासाठी केंद्र सरकारचा मोठा निर्णय

नवी दिल्ली :
अमेरिका, इस्रायल आणि इराणमध्ये 11 दिवसांपासून भयंकर युद्ध सुरूच आहे. आखाती देशांमध्ये युद्धाची आग धुमसत असल्याने येथून भारताला होणारा खनिज तेलाचा आणि नैसर्गिक वायूचा पुरवठा जवळपास ठप्प झाला आहे. त्यामुळे आता महाराष्ट्रासह संपूर्ण देशात घरगुती गॅस, नैसर्गिक वायू आणि व्यावसायिक गॅस सिलिंडरचा तुटवडा जाणवू
लागला आहे. पुढील काही दिवस युद्ध सुरू राहिल्यास ही परिस्थिती आणखी गंभीर स्वरूप धारण करू शकते. या पार्श्वभूमीवर गॅसचा तुटवडा जाणवू लागल्याने केंद्र सरकारने देशभरात एस्मा अर्थात,
आवश्यक सेवा पुरवठा अधिनियम कायद्याची अंमलबजावणी केली आहे.
या कायद्यामुळे आता देशभरात आवश्यक वस्तूंची साठवणूक आणि काळा बाजार करण्यावर प्रतिबंध लागणार आहे. आखात देशांमध्ये सुरू असलेल्या युद्ध परिस्थितीच्या पाश्वर्र्भूमीवर केंद्र सरकारने हा निर्णय घेतल्याचे समजते.
आखाती देशांमधील युद्ध परिस्थितीमुळे जगभरात इंधन टंचाईचे संकट जाणवू लागले आहे.

एस्मा कायदा काय आहे?

एस्मा (आवश्यक सेवा पुरवठा अधिनियम) हा कायदा भारतीय संसदेने 1968 साली मंजूर केला होता. आपत्कालीन काळात आवश्यक सेवा आणि सुविधांचा विनाखंड पुरवठा सुरू राहावा, यादृष्टीने हा कायदा तयार करण्यात आला होता. दैनंदिन वापरात लागणार्‍या गोष्टी आणि सेवांचा एस्मा कायद्याच्या कार्यकक्षेत समावेश होतो. संपाच्या काळात कामगारांना पुन्हा कामावर रुजू करण्यासाठी या कायद्याचा वापर केला जातो. त्यामुळे बंद व कर्फ्यूच्या काळातही कर्मचार्‍यांना काम करण्यास नकार देता येत नाही.

Gas shortage, ESMA Act implemented