नाशिकमध्ये अवैध सावकारीचा पर्दाफाश

लाखोंचे कोरे चेक, स्टॅम्प, नोटरी दस्तऐवज जप्त

वडाळागाव : प्रतिनिधी
मुंबई नाका पोलीस ठाण्याच्या हद्दीत अवैधरीत्या सावकारी व्यवसाय करणार्‍यांविरोधात मोठी कारवाई करण्यात आली असून, महाराष्ट्र सावकारी अधिनियम 2014 अंतर्गत गुन्हा दाखल करण्यात आला आहे.
या प्रकरणात तक्रारदार प्रदीप गोविंदराव महाजन (वय 55, रा. मखमलाबाद रोड, पंचवटी) यांनी दिलेल्या तक्रारीनुसार, राहत अश्फाक अन्सारी (रा. रेहनुमाननगर, नाशिक) यांच्यासह काही संशयित व्यक्तींकडून अवैधरीत्या सावकारी व्यवसाय केला जात असल्याचे निदर्शनास आले आहे. तपासादरम्यान आरोपींच्या ताब्यातून विविध महत्त्वाचे दस्तऐवज व पुरावे जप्त करण्यात आले. त्यामध्ये कोरे चेक, हातउसनवारी पावत्या, नोटरी केलेले करारनामे, विविध बँकांचे चेक बुक्स, वाहन विक्री करारनामे, स्टॅम्पपेपरवरील व्यवहार, पासपोर्ट फोटो, आधार व पॅन कार्ड प्रती आणि बँक स्टेटमेंट आदींचा समावेश आहे. याशिवाय, व्यवहारांची नोंद असलेली 24 पाने असलेली नोटबुक व क्लासमेट कंपनीची ए-4 साइझची नोंदवहीही जप्त करण्यात आली आहे.
विशेष म्हणजे, या कारवाईत मिळालेल्या दस्तऐवजांवर अनेक व्यक्तींच्या सह्या असून, त्यांच्यामार्फत मोठ्या प्रमाणावर सावकारी व्यवहार केल्याचे संकेत मिळत आहेत. संशयित राहत अन्सारी यांच्याजवळून विविध बँकांचे चेकबुक व त्यांच्या खात्यांचे बँक स्टेटमेंटसुद्धा जप्त करण्यात आले आहेत.
या प्रकरणात मुंबई नाका पोलीस ठाण्यात महाराष्ट्र सावकारी अधिनियम 2014 मधील कलम 23, 39, 42 व 45 अंतर्गत गुन्हा दाखल करण्यात आला आहे.
पुढील तपास वरिष्ठ पोलीस निरीक्षक संतोष नरुटे यांच्या मार्गदर्शनाखाली सपोनि सुधीर पाटील करत आहेत.