अमेरिका-इस्रायल हल्ल्यात इराणचे सर्वोच्च नेते खामेनी ठार

नवी दिल्ली : अमेरिका आणि इस्रायल यांनी केलेल्या संयुक्त कारवाईत इराणचे
सर्वोच्च नेते अयातुल्ला अली खामेनी यांचा मृत्यू झाला. त्यांच्यासह मुलगी, जावई, नात आणि काही सहकारीही मृत्युमुखी पडले. इराणच्या सरकारी माध्यमांनी अधिकृतपणे खामेनी यांच्या मृत्यूला दुजोरा दिला. या घटनेनंतर, इराण सरकारने 40 दिवसांचा राष्ट्रीय शोक आणि सात दिवसांची सार्वजनिक सुट्टी जाहीर केली. इराणने या कारवाईनंतर बदला घेण्याचा इशारा अमेरिका आणि इस्रायलला दिला. दरम्यान, खामेनी यांच्या मृत्यूनंतर इराणने त्यांचे उत्तराधिकारी म्हणून इराणच्या सर्वोच्च नेतेपदी अलिरेझा अराफी यांची निवड केली आहे.

इराणचा पलटवार; बदला घेतला

अमेरिका आणि इस्रायलच्या हल्ल्यांना प्रत्युत्तर म्हणून इराणने आतापर्यंत कुवेत, कतार, इराक, सौदी अरेबिया या देशांतील अमेरिकन लष्करी तळांवर हल्ले केले आहेत. याशिवाय इराणने संयुक्त अरब अमिरातीवरही हल्ला केला.

अमेरिका- इस्रायल यांनी इराणविरुद्ध सुरू केलेल्या कारवाईमुळे जग हादरून गेले असून, त्याचा फटका भारतालादेखील बसणार आहे. 2025 मध्ये इराण-इस्रोयल युद्ध आणि इराण समर्थित गटांशी झालेल्या संघर्षांमुळे इस्रायलच्या नेत्यांनी जानेवारी इराणला वारंवार इशारा दिला होता की, ते त्यांच्या अण्वस्त्र कार्यक्रम आणि क्षेपणास्त्र क्षमतांचा अनियंत्रित विस्तार करू देणार नाहीत. परंतु इराणने अशा कोणत्याही गोष्टींना जुमानले नाही. इराणने आपला संवेदनशील अण्वस्त्र कार्यक्रम आणि क्षेपणास्त्र संबंधित प्रक्रिया सुरूच ठेवल्या. अनेकदा इशारे देऊनही इराण थांबत नाही, असे दिसताच इस्रायल आणि अमेरिकेने इराणची राजधानी तेहरानवर हल्ला चढवला, ज्यामुळे मध्यपूर्वेत पुन्हा एकदा तणाव निर्माण झाल्याचे पाहायला मिळत आहे. 28 फेब्रुवारी 2026 रोजी सकाळी तेहरानमधील खामेनी यांच्या निवासस्थानावर आणि कार्यालयावर नेते अयातुल्ला अली खामेनी यांच्या कार्यालयांजवळ क्षेपणास्त्र डागण्यात आली. तसंच त्यांच्या घराजवळ बंकर बस्टिंग क्षेपणास्त्र डागण्यात आलं. त्यामुळे खामेनी यांचा मृत्यू झाल्याचा दावा करण्यात आला.
इराणने सुरुवातीला दावे नाकारले, परंतु नंतर पुष्टी केली की 86 वर्षीय खामेनी शहीद झाले आहेत. इस्रायली अधिकार्‍यांच्या मते, त्यांचा मृतदेह ढिगार्‍यातून सापडला आहे. यापूर्वी, अमेरिकेचे अध्यक्ष डोनाल्ड ट्रम्प यांनी पोस्ट केले होते की इतिहासातील सर्वात वाईट माणसांपैकी एक असलेल्या खामेनीचा मृत्यू झाला आहे तो आपल्या गुप्तचर यंत्रणा आणि अत्यंत प्रगत ट्रॅकिंग सिस्टीमपासून वाचू शकला नाही आणि इस्रायलसोबत काम करून, तो आणि त्याच्यासोबत मारले गेलेले इतर नेते काहीही करू शकले नाहीत.
त्यांनी पुढे लिहिले की इराणी लोकांसाठी त्यांचा देश परत मिळवण्याची ही सर्वात मोठी संधी आहे. आम्ही ऐकत आहोत की त्यांच्या अनेक आयआरजीसी, लष्करी आणि इतर सुरक्षा आणि पोलिस दलांना आता लढायचे नाही आणि त्यांना आपल्याकडून सूट हवी आहे. मी काल रात्री म्हटल्याप्रमाणे, आता त्यांना सूट मिळू शकते, नंतर त्यांना फक्त मृत्यू मिळेल! आशा आहे की, आयआरजीसी आणि पोलिस शांततेने इराणी देशभक्तांसोबत सामील होतील आणि देशाला त्याच्या पात्रतेनुसार महानता परत मिळवून देण्यासाठी एक युनिट म्हणून एकत्र काम करतील.
ट्रम्प म्हणाले की ही प्रक्रिया लवकरच सुरू झाली पाहिजे कारण केवळ खामेनीच मृत पावले नाहीत, तर देश पूर्णपणे उद्ध्वस्त झाला आहे आणि अगदी एका दिवसात पूर्णपणे नष्ट झाला आहे. संपूर्ण आठवडाभर किंवा मध्य पूर्व आणि खरंच संपूर्ण जगात शांततेचे आपले ध्येय साध्य करण्यासाठी आवश्यक तोपर्यंत जोरदार आणि अचूक बॉम्बहल्ला सुरू राहील.
उत्तरप्रदेशातील किंतूरमध्ये शोककळा!
इस्रायल-इराण हल्ल्यात ठार झालेले इराणचे सर्वोच्च नेते आणि धर्मगुरू अयातुल्ला अली खामेनींच्या मृत्यूच्या बातमीने उत्तर प्रदेशातील बाराबंकी जिल्ह्यातील किंतूर गावात शोककळा पसरली. खामेनींचे आजोबा सय्यद अहमद मुसावी हिंदी यांचे मूळ या गावाशी संबंधित आहे. बाराबंकीच्या सिरौली गौसपूर तहसीलमधील किंतूर गावाचा खामेनी कुटुंबाशी ऐतिहासिक संबंध असल्याचं सांगितलं जातं. अयातुल्ला खामेनी यांचे आजोबा सय्यद अहमद मुसावी हिंदी हे 18 व्या-19 व्या शतकात याच गावात राहत होते, अशी माहिती स्थानिकांकडून दिली जाते.
पुण्यातील 84 एमबीए विद्यार्थी दुबईत अडकले
पुणे: पश्चिम आशियातील संघर्षामुळे हवाई क्षेत्र बंद झाल्यामुळे पुण्यातील एका संस्थेतील 84 एमबीए विद्यार्थी दुबईमध्ये अडकले होते, असे संस्थेने रविवारी सांगितले. इंदिरा स्कूल ऑफ बिझनेस स्टडीजचे 84 एमबीए विद्यार्थी वार्षिक पाच दिवसांच्या अभ्यास दौर्‍यासाठी दुबईला गेले होते. ते सुरक्षित होते आणि त्यांना हॉटेलमध्ये हलवण्यात आले, असे आयएसबीएस अधिकार्‍यांनी सांगितले. शनिवारी 40 विद्यार्थी पुण्याला परतणार होते, तर उर्वरित 44 विद्यार्थी रविवारी विमानाने प्रवास करणार होते. तथापि, पश्चिम आशियातील संघर्ष आणि त्यानंतर हवाई क्षेत्र बंद झाल्यामुळे ते प्रवास करू शकले नाहीत, असे अधिकार्‍यांनी सांगितले.
सौदीत 50 हजार मराठी मुस्लिम अडकले
नागपूर : रमजान काळात उमरा या धार्मिक विधीसाठी महाराष्ट्रातून सौदी अरेबियात गेलेले 50 हजार ते 1 लाख मुस्लिम बांधव अडकले असल्याची भीती राज्य अल्पसंख्यांक आयोगाचे अध्यक्ष प्यारे खान यांनी व्यक्त केली. राज्य अल्पसंख्यांक आयोगाने यासंदर्भात तातडीने हालचाली सुरू करत सर्वांना सुरक्षित परत आणण्यासाठी मोहीम सुरू केली आहे. यंदा राज्यातील सुमारे 500 टूर ऑपरेटर्सनी उमरा या धार्मिक विधीसाठी यात्रेकरूंना पाठवले असून, त्यापैकी केवळ मुंबईतूनच 100 हून अधिक ऑपरेटर्स सक्रिय होते, अशी माहिती समोर आली आहे. रमजानच्या पार्श्वभूमीवर ‘उमरा’ या धार्मिक विधीसाठी मक्का-मदीना येथे गेलेल्या महाराष्ट्रातील मुस्लिम बांधवांची संख्या 50 हजार ते एक लाखांच्या दरम्यान असू शकते, अशी भीती व्यक्त करण्यात आली आहे.
इराणी जेट बॉम्बचा अमेरिकन तळावर हल्ला
पश्चिम आशियातील अमेरिकन तळांवर आणि इराकमधील कुर्दिस्तान भागातील अमेरिकन तळांवर इराणच्या जेट बॉम्बने हल्ला करण्यात आल्याची माहिती इराणचे सरकारी माध्यमसंस्थेने दिली. इराणच्या वैमानिकांनी यशस्वीरीत्या या तळांवर हल्ले केले. वायू सेनेच्या लढाऊ विमानांच्या सहाय्याने शत्रूंच्या लष्करी तळांवर हल्ला केल्याचे देखील त्यांनी सांगितले.
इस्रायलचे लष्करी मुख्यालय लक्ष्य
आयआरजीसीने दिलेल्या या निवेदनात त्यांनी अमेरिकेचे 27 तळ तसंच तेल अवीवमधील लष्करी तळ, इस्रायलच्या लष्कराचं जनरल कमांड मुख्यालय आणि तेल अवीवमधील मोठ्या संरक्षण औद्योगिक संकुलाला लक्ष्य केल्याचं म्हटलं आहे. सर्वोच्च नेते अयातुल्ला अली खामेनी यांचा मृत्यू झाल्याची बातमी आली तेव्हा इराणने हे पाऊल उचलले आहे. इराणचं सैन्य त्यांच्या ताब्यातील भागात आणि अमेरिकेच्या तळांवर वाजणारे धोक्याचे सायरनला बंद होऊ देणार नाही, असा दावाही निवेदनात करण्यात आला आहे.

Iran’s Supreme Leader Khamenei killed in US-Israeli attack