छ. संभाजीनगर रस्त्यावर वाहनाच्या धडकेत बिबट्याचा बळी

निफाड : तालुका प्रतिनिधी
छत्रपती संभाजीनगर महामार्गावर गोंडेगाव फाट्याजवळ रविवारी सायंकाळी सात वाजेच्या दरम्यान रस्ता ओलांडताना अज्ञात वाहनाने दिलेल्या धडकेत एका बिबट्याचा जागीच मृत्यू झाल्याची घटना घडली आहे. मृत झालेला बिबट्या अंदाजे 7 ते 8 महिने वयाचा असल्याची माहिती वन विभागाने दिली आहे.
निफाडच्या गोदाकाठ परिसरात उसाचे क्षेत्र सर्वाधिक आहे. साहजिकच या परिसरात बिबट्यांचा सर्वाधिक असल्याची बाब वेळोवेळी समोर आली आहे, यापूर्वीदेखील याच महामार्गावर शिवरे फाटा, नागपूर फाटा येथे देखील वाहनाच्या धडकेत बिबट्या मृत झाल्याची घटना घडली आहे.
रविवारी सायंकाळी गोंडेगाव फाटा येथे महामार्ग ओलांडत असताना वाहनाची धडक बसून बिबट्या मृत झाल्याची घटना घडली. बिबट्या मृत झाल्याचे समजताच परिसरातील नागरिकांनी याबाबतची माहिती वन विभागाला दिली. वन विभागाचे निफाड वनपरिक्षेत्र अधिकारी विजय दोंदे सहकार्‍यांसह घटनास्थळी दाखल झाले. त्यांनी रात्रीच मृत बिबट्यास निफाड येथील वन विभागाच्या रोपवाटिकेत आणले. मृत बिबट्यावर रोपवाटिकेत अंतिम संस्कार करण्यात आले.
निफाड तालुक्यात बिबट्यांचा वावर वाढल्याने नागरिकांनी तसेच वाहनधारकांनी काळजी घ्यावी. तसेच आपली पाळीव जनावरे सुरक्षित ठिकाणी बांधावीत. वस्तीवर राहणार्‍या नागरिकांनी रात्रीच्या वेळेस एकट्याने घराबाहेर पडू नये. वस्तीवर राहणार्‍या नागरिकांनी रात्रीच्या वेळेस लहान मुलांना घराबाहेर एकटे सोडू नये. आपल्या परिसरात दिवे लावावेत, असे आवाहन वन विभागाने केले आहे.

Leopard killed in vehicle collision on Ch. Sambhajinagar road