चितेगाव शिवारात विहिरीत पडलेल्या बिबट्यास जीवदान

आधुनिक बचाव पथक, एआरइएएस फाउंडेशन, वनराजा पथकाची मोहीम

ओझर : वार्ताहर
निफाड तालुक्यातील चितेगाव येथे कुत्र्याचा पाठलाग करताना विहिरीत पडलेल्या बिबट्यास नाशिक पूर्व वनविभागाचे आधुनिक बचाव पथक निफाड व एआरइएएस फाउंडेशन संस्था तसेच निर्भय संचार फाउंडेशन संचलित वनराजा संस्थेच्या मदतीने सुरक्षितरीत्या बचावकार्य करण्यात आले.
याबाबत अधिक माहिती अशी की, गुरुवारी (दि.21) रात्री आठच्या सुमारास चितेगाव येथील सुभाष साहेबराव गाडे यांच्या घराजवळील विहिरीजवळ बिबट्या कुत्र्यावर हल्ला करण्याच्या उद्देशाने आला होता. कुत्रा स्वतःचा जीव वाचवत पळाला व त्याचा पाठलाग करत असताना कुत्रा व बिबट्या दोन्ही विहिरीत पडले. ही गोष्ट सुभाष गाडे यांच्या लक्षात येताच त्यांनी तत्काळ पोलीसपाटील राहुल दळवी व सरपंच सुभाष गाडे यांना कळवले, तसेच एआरइएएस फाउंडेशनचे संचालक, वन्यजीव अभ्यासक अमोल सोनवणे यांना फोनवरून माहिती दिली.
नाशिक पूर्व वनविभागाचे उपवनसंरक्षक राकेश सेपट, सहाय्यक वनसंरक्षक शिवाजी सहाणे, येवला वनपरिक्षेत्र अधिकारी राहुल घुगे यांच्या मार्गदर्शनाखाली येवला वन परिक्षेत्राचे आधुनिक बचाव पथक व एआरईएएस फाउंडेशनचे सदस्य व निर्भय संचार फाउंडेशन संचलित वनराजा संस्थेच्या सदस्यांनी घटनास्थळी पोहोचून शेताच्या विहिरीत पिंजरा सोडला. तत्पूर्वी बिबट्याने विहिरीत मोटारच्या पाइपचा आधार घेऊन स्वतःला वाचवण्याचे प्रयत्न सुरू केले होते. विहिरीत सोडलेल्या पिंजर्‍यात बिबट्याला जेरबंद करून सुरक्षित बाहेर काढून जीवदान दिले. पुढील कार्यवाहीसाठी बिबट्याला निफाड वनोद्यानात नेण्यात आले. बचावकार्यानंतर नागरिकांचे प्रबोधन केले.
यावेळी वनपरिक्षेत्र अधिकारी राहुल घुगे, वनपाल जयराम शिरसाठ, वनरक्षक विजय दोंदे, आधुनिक बचाव पथकाचे सदस्य भारत माळी, विजय माळी, शरद चांदोरे, सागर दुशिंग, सादिक शेख, वैभव दौंड, रितेश निहारे, मयूर गांगुर्डे, ज्ञानेश्वर पवार, काशीनाथ माळी आणि एआरईएएस फाउंडेशनचे वन्यजीव अभ्यासक अमोल सोनवणे, सुशांत रणशूर, हेमंत वानले, मोहन जगताप, पवन नागपुरे, मंगेश चारोस्कर, करण पवार, योगेश शेजवळ, राजेश शेजवळ, निर्भय संचार फाउंडेशनचे शरद जाधव, शंभू जाधव, नीलेश उल्लारे यांनी बचावकार्य केले. सरपंच सुभाष गाडे, ग्रामविकास अधिकारी विजया वायकर, तलाठी शेखर पाटील, पोलीसपाटील राहुल दळवी व ग्रामस्थांंचे
सहकार्य लाभले.