लासलगाव येथील विवाहितेचा पैशांसाठी छळ

पतीसह चौघांवर गुन्हा दाखल; मारहाणीसह घराबाहेर काढले

लासलगाव : प्रतिनिधी
लग्नानंतर माहेरहून पैसे आणण्याच्या मागणीसाठी विवाहितेचा शारीरिक व मानसिक छळ करून तिला घराबाहेर काढल्याप्रकरणी लासलगाव पोलीस ठाण्यात पती, सासू, नणंद आणि नंदईविरुद्ध गुन्हा दाखल करण्यात आला आहे. याप्रकरणी प्रेरणा आशुतोष सोनवणे (वय 24, सध्या रा. गुंजाळवाडी, निफाड) यांनी फिर्याद दिली आहे.
फिर्यादीनुसार, प्रेरणा यांचा विवाह 14 मे 2025 रोजी आशुतोष ज्ञानेश्वर सोनवणे (रा. सुरेगाव, कोपरगाव) यांच्याशी झाला होता. लग्नात मुलीच्या नातेवाइकांनी 20 लाख रुपये खर्च करून संसारोपयोगी साहित्य आणि दागिने दिले होते. लग्न झाल्यानंतर काही दिवसांतच सासरच्या लोकांनी “काम आणि स्वयंपाक येत नाही” या कारणावरून प्रेरणा यांचा अपमान करण्यास सुरुवात केली. पती आशुतोष हे संभाजीनगर येथे सरकारी रुग्णालयात कार्यरत असून, ते वैवाहिक जबाबदारी पार
पाडत नव्हते.
सासू निर्मला सोनवणे यांनी पतीच्या कर्जफेडीसाठी माहेरून 1 लाख 50 हजार रुपये आणायला लावले, जे नंतर परत केले नाहीत. तसेच लग्नातील दागिने लॉकरमध्ये ठेवून विवाहितेला वापरू दिले नाहीत. संभाजीनगर येथे राहण्यास गेल्यानंतरही पतीने त्रास देणे सुरूच ठेवले. आजारपणात उपचार न करणे, मारहाण करणे असे प्रकार पतीने केले. नणंद तेजश्री लासुरे आणि नंदई भागचंद लासुरे यांनीही पतीची बाजू घेऊन विवाहितेला शिवीगाळ केली. डिसेंबर 2025 मध्ये सासरी झालेल्या बैठकीत पतीने आणखी 50 हजार रुपयांची मागणी केली. पैसे देण्यास नकार दिल्याने सर्वांनी मिळून प्रेरणा यांना मारहाण करून
घराबाहेर काढले.
नाशिक येथील महिला दक्षता विभागात झालेले समेटाचे प्रयत्न अपयशी ठरल्यानंतर अखेर लासलगाव पोलिसांत तक्रार करण्यात आली. पोलिसांनी पती आशुतोष, सासू निर्मला, नणंद तेजश्री आणि नंदई भागचंद लासुरे यांच्याविरुद्ध भारतीय न्याय संहिता 2023 अंतर्गत गुन्हा दाखल केला असून, हवालदार ज्ञानेश्वर जाधव तपास करत आहेत.

Married woman from Lasalgaon harassed for money

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.