करवसुलीसाठी प्रशासन सक्त
नाशिक : प्रतिनिधी
थकबाकीचा आकडा सातशे कोटींच्या घरात गेल्याने महापालिका प्रशासनाने 909 थकबाकीदारांना जप्तीच्या नोटिसा धाडल्या आहेत. दरम्यान, करदात्यांना मालमत्ता कर व पाणीपट्टीचा भरणा करण्यासाठी माहे
फेब्रुवारी व मार्च 2026 चे सर्व शनिवार, रविवार व सार्वजनिक सुट्यांच्या दिवशी वसुली केंद्र कार्यालय व भरणा कार्यालये सुरू ठेवण्यात आलेले आहे.
शहरातील सिडको, सातपूर, पंचवटी, नाशिकरोड, नाशिक पूर्व तसेच नाशिक पश्चिम या सहा विभागांतील 909 थकबाकीधारकांना महापालिकेने जप्तीचे वॉरंट बजावले आहे. मिळकतधारकांनी अधिपत्र बजावणी केल्याच्या दिनांकापासून 21 दिवसांच्या आत थकीत मालमत्ता कर भरणा न केल्यास सदरच्या मिळकती लिलाव प्रक्रियेत घेऊन जप्तीची कारवाई करण्यात येईल, असा इशारा प्रशासनाने दिला आहे. जप्तीची कारवाई टाळण्यासाठी मिळकतधारकांनी मालमत्ता कर दिलेल्या मुदतीत भरून सहकार्य करावे, असे आवाहन मनपा आयुक्त मनीषा खत्री यांनी केले आहे. दरम्यान, थकबाकीदारांनी प्रतिसाद न दिल्यास त्यांच्या घरासमोर ढोल वाजवण्याचा निर्णय घेतला आहे. कर विभागाने सहाही विभागांतील तीन हजार थकबाकीदारांची यादी तयार केली आहे.
Municipal Corporation notices to nine hundred defaulters