नदीच्या पुलावरून पडून दुचाकीस्वार गंभीर जखमी

सिडको विशेष प्रतिनिधी : सातपूर-अंबड लिंक रोडवरील नंदिनी नदीवर नव्याने उभारण्यात आलेल्या सिमेंट पुलावरून एकजण दुचाकीसह नदीत पडल्याची घटना घडली. पुलाला कोणताही सुरक्षा कठडा नसल्यानेे ही दुर्घटना घडल्याचे समोर आले आहे. सातपूर पोलिसांनी दिलेल्या माहितीनुसार, नरेंद्र गौतम (वय 37, रा. बजरंगनगर, लिंक रोड) दुचाकीवरून जाताना या पुलावरून सुमारे 30 फूट खोल नदीत पडले. पुलाला सुरक्षा कठडे नसल्यानेे आणि पुढील भागाचे काम सुरू असल्यामुळे ही दुर्घटना घडल्याचे प्रत्यक्षदर्शी सांगतात. या घटनेनंतर सातपूर पोलिसांनी घटनास्थळी धाव घेतली आणि नदीपात्रात उतरून नरेंद्र गौतम यांना बेशुद्धावस्थेत बाहेर काढले. तत्काळ 108 रुग्णवाहिकेच्या सहाय्याने प्राथमिक उपचार देण्यात आले. उपचारानंतर शुद्धीवर आलेल्या गौतम यांनी आपण कसे पडलो हेच कळले नाही, असे सांगितले. या अपघातात त्यांच्या पाठीच्या मणक्याला व पायाला गंभीर दुखापत झाली आहे. त्यांच्यावर नाशिकच्या शासकीय रुग्णालयात उपचार सुरू आहेत. घटनास्थळी सातपूर पोलीस ठाण्याचे सहाय्यक पोलीस निरीक्षक राजू पठाण, उपनिरीक्षक शिवराम खांडवी, पूजा भांगरे, पोलीस कॉन्स्टेबल राहुल खांडबहाले, राजू जाधव तसेच अंबड पोलीस ठाण्याचे पोलीस कॉन्स्टेबल रमेश पवार, अशोक श्रीकांडे व 108 रुग्णवाहिकेचे डॉक्टर व वाहनचालक चंद्रशेखर जोशी यांनी मदतकार्य केले.