औद्योगिक वसाहतीसाठी भूसंपादनाला विरोध

आडवण, पारदेवी येथील शेतकर्‍यांचा ठिय्या आंदोलनाचा इशारा

इगतपुरी : प्रतिनिधी
तालुक्यातील आडवण, पारदेवी येथील शेतकर्‍यांच्या वडिलोपार्जित शेतजमिनी औद्योगिक वसाहतीसाठी संपादित करण्यात येणार असल्याने शेतकरी आक्रमक झाले आहेत. शेतजमिनींची मोजणी करू नये, जमिनीच्या सातबारावर घेतलेल्या नोंदी रद्द करून कमी कराव्यात, या मागणीचे निवेदन तहसीलदार व पोलीस निरीक्षक राहुल तसरे यांना देण्यात आले.
या शेतकर्‍यांनी जमिनी देण्यास नकार देत मोजणी करण्यास विरोध दर्शविला होता. यासाठी 1 मेस येथील शेतकर्‍यांनी सामूहिक आत्मदहनाचा इशारा दिला होता. मात्र, यासंदर्भात जिल्हाधिकार्‍यांंनी नाशिक येथील कार्यालयात शेतकर्‍यांची 1 मेस बैठक घेतली होती. त्यावेळी सांगितले होते की, वरिष्ठांना विचारल्याशिवाय जमिनी मोजणी व नोंदी करणार नाही. पण कोणताही मार्ग न काढता शासनस्तरावर शेतजमिनीची मोजणी करीत सातबार्‍यावर नोंदी करण्यात आल्या.
आडवण, पारदेवी येथील शेतकर्‍यांनी आक्रमक पवित्रा घेत सातबार्‍यावर घेतलेल्या नोंदी त्वरित कमी कराव्यात. वडिलोपार्जित जमिनी औद्योगिक वसाहतीसाठी देणार नाही, असा इशारा निवेदनाद्वारे दिला. औद्योगिक वसाहतीला विरोध दर्शवत सातबारावरील नोंदी कमी कराव्यात; अन्यथा मंगळवार(दि. 6)पासून तहसील कार्यालयासमोर ठिय्या आंदोलन करण्यात येईल. याबाबत शासनाने तत्काळ दखल घ्यावी, असेही निवेदनात म्हटले आहे. रमेश कोकणे, नवनाथ कोकणे, विश्राम शेलार, विष्णू कोकणे, नामदेव कोकणे, रामदास रेरे, ज्ञानेश्वर कोकणे, तुकाराम कोकणे आदींच्या निवेदनावर सह्या आहेत.