बंद घरातून सात लाखांचा ऐवज लंपास

सिडको : विशेष प्रतिनिधी
पाथर्डी शिवार परिसरातील पांडववन फ्लॅट येथे बंद घरातून सुमारे 6 लाख 83 हजार 400 रुपयांचा मुद्देमाल चोरीस गेल्याची घटना उघडकीस आली आहे. या प्रकरणी इंदिरानगर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत रंगनाथ अर्जुन मोरे (वय 63, व्यवसाय शेती, रा. बंगला नं. ठ-4, पांडववन फ्लॅट नं. 190/2, गौळाणे, पाथर्डी रोड, पाथर्डी शिवार, नाशिक) यांनी फिर्याद दिली आहे. त्यांच्या तक्रारीनुसार अज्ञात चोरट्याने त्यांच्या बंद घराच्या बेडरूमचे लोखंडी गज कापून खिडकीची काच फोडून आत प्रवेश केला. त्यानंतर दोन्ही बेडरूममधील लाकडी कपाटांचे दरवाजे तोडून त्यातील सोने-चांदीचे दागिने व रोख रक्कम लंपास केली.
चोरीस गेलेल्या मुद्देमालात सुमारे 2 लाख 98 हजार रुपयांचे 74 ग्रॅम वजनाचे मंगळसूत्र, एक लाख रुपयांचा सोन्याचा नेकलेस (25 ग्रॅम), एक लाख 20 हजार रुपयांचे सोन्याचे कडे (30 ग्रॅम), 20 हजार रुपयांचे ब्रेसलेट (5 ग्रॅम), 50 हजार रुपयांच्या दोन सोन्याच्या अंगठ्या (12 ग्रॅम), 6 हजार रुपयांचे झुमके (2.5 ग्रॅम), 4 हजार रुपयांचे कानातील टॉप (2 ग्रॅम), 24 हजार रुपयांची सोन्याची चेन (6 ग्रॅम), एक हजार रुपयांच्या चांदीच्या साखळ्या (5 ग्रॅम), 400 रुपयांची सोन्याची नथ, तसेच 60 हजार रुपये रोख रक्कम (500 रुपयांच्या नोटा) आणि आधार कार्ड, पॅनकार्ड आदी कागदपत्रांचा समावेश आहे. या प्रकरणी इंदिरानगर पोलीस ठाण्यात गुन्हा दाखल करण्यात आला असून, या प्रकरणाचा पुढील तपास इंदिरानगर पोलीस ठाण्याचे वरिष्ठ पोलीस निरीक्षक मनोहर कारंडे यांच्या मार्गदर्शनाखाली सहाय्यक पोलीस निरीक्षक भूषण सोनार करीत आहेत.

Property worth seven lakhs stolen from a locked house