येवला औद्योगिक वसाहतीत मूलभूत सोयी-सुविधा उपलब्ध करा : मंत्री भुजबळ

येवला : प्रतिनिधी
येवला औद्योगिक वसाहतीमध्ये मूलभूत सोयी-सुविधांची तत्परतेने उपलब्धता करावी, तसेच या सुविधा उपलब्ध करून देईपर्यंत उद्योजकांना विनाशुल्क मुदतवाढ द्यावी, असे निर्देश अन्न, नागरी पुरवठा व ग्राहक संरक्षणमंत्री छगन भुजबळ यांनी दिले.
मुंबईत मंत्रालयात येवला औद्योगिक वसाहतीतील प्रश्नांबाबत आयोजित आढावा बैठकीत मंत्री भुजबळ यांनी संबंधितांना सूचित केले. या बैठकीस आमदार पंकज भुजबळ, माजी खासदार समीर भुजबळ, येवला नगरपरिषदेचे नगराध्यक्ष राजेंद्र लोणारी, कृषी उत्पन्न बाजार समितीचे सभापती वसंत पवार यांच्यासह एमआयडीसीचे मुख्य कार्यकारी अधिकारी पी. वेलारासू यांच्यासह एमआयडीसीसह इतर संबंधित यंत्रणांचे अधिकारी उपस्थित होते
मंत्री भुजबळ यांनी सूचित केले की, येवला औद्योगिक विकासाच्या दृष्टीने या वसाहतीचा पूर्णक्षमतेने विकास करणे आवश्यक आहे. या पार्श्वभूमीवर या वसाहतीतील उद्योजकांना पाण्याची उपलब्धता तातडीने करून देण्यात यावी. यासाठीची आवश्यक कार्यवाही करत असतानाच याठिकाणी पाणीपुरवठ्याची कायमस्वरूपी व्यवस्था करण्यासाठी सुरू असलेल्या कामालाही गती द्यावी.
या वसाहतीतील विजेचा पुरवठा आणि रस्त्यांची सुविधा उपलब्ध करून देण्यास प्राधान्य द्यावे. या सर्व सुविधांची उभारणी होईपर्यंत याठिकाणी नोंदणी केलेल्या उद्योजकांना व्यवसाय उत्पादन सुरू करण्यासाठीच्या कालावधीला विनाशुल्क मुदतवाढ देण्यात यावी. या उद्योजकांच्या उद्योग बांधकामासाठी दोन वषार्ंचा कालावधी वाढवून द्यावा. त्यासोबतच या ठिकाणच्या मूलभूत सोयी-सुविधांची तातडीने कायमस्वरूपी उभारणी करण्यासाठी क्षेत्रीय स्तरावर संबंधित यंत्रणांनी बैठक घेऊन या कामाला गती देण्याच्या सूचना मंत्री भुजबळ यांनी यावेळी दिल्या.
येवला औद्योगिक वसाहतीतील भूखंडाचा प्रचलित दर जास्त असल्यामुळे याठिकाणी उद्योजक गुंतवणुकीसाठी आकृष्ट होत नाहीत. त्यामुळे या प्रचलित दरात किमान 50 टक्के सवलत द्यावी. याठिकाणी मोठा उद्योग येण्यासाठी प्रोत्साहन द्यावे, अशा सूचनाही भुजबळ यांनी केल्या. येवला औद्योगिक वसाहतीतील उद्योजकांच्या अडचणी समजून घेत यंत्रणांना त्या तत्परतेने सोडवण्याचेही मंत्री भुजबळ यांनी सूचित केले.

Provide basic amenities in Yeola Industrial Estate: Minister Bhujbal