नामपूर : वार्ताहर
राहुड (ता. बागलाण) येथील शेतकरी रामराव मोतीराम खैरनार यांचा संपूर्ण परिवार लग्नकार्यासाठी सुरत येथे गेला होता, तर अनिल खैरनार काळगाव येथे शेतीच्या कामासाठी गेला होता. घरात कोणीच नसताना घराला आग लागल्यानंतर शेजारील नागरिक भीमराव ठाकरे, सचिन ठाकरे यांनी धूर निघताना पाहिला. त्यांनी आग विझवण्याचा प्रयत्न केला.
मात्र, आगीत संसारोपयोगी साहित्य, घरातील कागदपत्रे, ट्रॅक्टरचे आरसी बुक, गहू, बाजरीचे पोते, पोल्ट्रीसाठी आणलेले पत्रे, मोटारी जलपरी, पिस्टन, सोने-चांदी व सहा शेळ्याही जळून खाक झाल्या.
टेंबे येथील भाऊसाहेब अहिरे, सरपंच डॉ. शेषराव पाटील, बाजार समिती संचालक सयाजी देवरे यांनी घटनास्थळी भेट देऊन परिवाराचे सांत्वन केले. भाऊसाहेब अहिरे यांनी आर्थिक मदत केली.तलाठी विष्णू गायकवाड यांनी तीन लाखांचा पंचनामा केला आहे.
Rahul’s house catches fire; loss of Rs 3 lakhs