दिलासादायक:कोकण, मराठवाड्यात आनंदघन बसणार

हवामान विभाग: चार -पाच दिवसात मुसळधार पावसाची शक्यता
पुणे : गेल्या काही दिवसांपासून उन्हाच्या तप्त झळा आणि घामाच्या धारांनी हैराण झालेल्या नागरिकांना लवकरच दिलासा मिळणार आहे . येत्या चार – पाच दिवसांत पावसाची शक्यता हवामान खात्याकडून वर्तवण्यात आली आहे . यामुळे उष्माघाताने त्रासलेल्या नागरिकांना तूर्तास तरी दिलासा मिळाणार आहे . यंदा मान्सून वेळेआधीच दाखल होणार आहे . अंदमानात मान्सून दाखल झाला आहे . तर २७ मे रोजी तो केरळात दाखल होण्याची शक्यता आहे . पुणे हवामान विभागाचे प्रमुख कृष्णानंद होसाळीकर यांनी ट्विट करत यासंबंधी माहिती दिली आहे . १७ ते २१ मेदरम्यान दक्षिण मध्य महाराष्ट्र , दक्षिण कोकण आणि मराठवाड्यात काही ठिकाणी मेघगर्जनेसह पाऊस पडण्याची शक्यता आहे . त्याचवेळी उत्तर मध्य महाराष्ट्र आणि विदर्भात काही ठिकाणी उष्णतेची लाट येण्याची शक्यता आहे .

२७ ला मान्सून केरळमध्ये

अंदमानच्या समुद्रात काल मान्सून दाखल झाल्याची माहिती भारतीय हवामानशास्त्र विभागाने दिली आहे . नैर्ऋत्य मान्सून अंदमानच्या समुद्रात दाखल झाला आहे . सहा दिवस आधीच १६ मे रोजी मान्सून अंदमानच्या समुद्रात दाखल झाला आहे . २७ मे रोजी मान्सून केरळमध्ये दाखल होण्याचा अंदाज आहे . मात्र , त्याआधीच मान्सून दाखल होण्याची शक्यता अधिक वर्तवली जात आहे .