देवगावच्या अंगणवाडीतील पोषण आहाराचे घेतले नमुने

मृत पक्षी आढळल्याने खळबळ; जिल्हा परिषद अधिकार्‍यांकडून पंचनामा

निफाड : तालुका प्रतिनिधी
देवगाव (ता. निफाड) येथील इंदिरानगर अंगणवाडी केंद्रात वितरित केलेल्या घरपोच पोषण आहाराच्या बंद पाकिटात मृत पक्षी आढळल्याच्या गंभीर घटनेची दखल जिल्हा प्रशासनाने घेतली आहे. यासंदर्भात दैनिक गांवकरीत वृत्त प्रसिद्ध होताच, रविवारी (दि. 19 जुलै) जिल्हा परिषदेचे उपमुख्य कार्यकारी अधिकारी प्रताप पाटील, महिला व बालविकास अधिकारी कोंढार आणि बालविकास प्रकल्प अधिकार्‍यांनी घटनास्थळी धाव घेत प्रत्यक्ष पाहणी केली.
येथील लाभार्थी प्रिन्स व गणेश सुखदेव माळी यांच्या कुटुंबाला 14 जुलैला पोषण आहाराचे पाकीट देण्यात आले होते. 18 जुलैला सकाळी त्यांची आई पूजा माळी यांनी आहार तयार करण्यासाठी पाकीट उघडले असता, त्यात मृत पक्षी आढळून आला. यानंतर माजी सरपंच विनोद जोशी, माजी सरपंच वैशाली अडांगळे, प्रशांत कुलकर्णी, मनोहर बोचरे, राजेंद्र मेमाणे यांच्यासह ग्रामस्थांच्या उपस्थितीत अधिकार्‍यांनी या पोषण आहाराचा रीतसर पंचनामा केला. सदर तूरडाळ-तांदूळ रिमिक्स पाकिटावर उत्पादन दि. 11 जून 2026 व बॅच क्रमांक एम.डी.के.-बी 02-06 अशी नोंद आहे. खबरदारीचा उपाय म्हणून देवगावमधील सर्व अंगणवाडी केंद्रांतील शिल्लक आहाराचे नमुने तपासणीसाठी प्रयोगशाळेत पाठविण्याचे निर्देश देण्यात आले आहेत. या घटनेचा सविस्तर अहवाल वरिष्ठांकडे सादर केला जाणार असून, तपासणीनंतर पुढील कारवाई केली जाईल, असे अधिकार्‍यांनी सांगितले.

लहान बालकांना देण्यात येणारा अंगणवाडीतील पोषण आहार आता असुरक्षित झाला असून, यामुळे मुलांच्या आरोग्याचा प्रश्न ऐरणीवर आला आहे. या प्रकरणाची सखोल चौकशी करून संबंधित उत्पादक कंपनीवर तात्काळ गुन्हा दाखल करण्यात यावा. – प्रशांत कुलकर्णी, ग्रामस्थ, देवगाव

दोन दिवसांपूर्वी अंगणवाडीतून पोषण आहार आणला होता. शनिवारी एक पुडा फोडला असता त्यात पक्ष्याचे पंख निघाले आणि रविवारी दुसरा पुडा फोडला तर त्यात थेट मेलेला पक्षीच आढळला. हा लहान मुलांच्या जीवाशी चाललेला खेळ आहे. – पूजा सुखदेव माळी, पालक, देवगाव

Samples of the nutritional food from the Devgaon Anganwadi were collected.