अतिवृष्टीमुळे शिष्यवृत्ती परीक्षा पुढे ढकलली

नाशिक : प्रतिनिधी शहरात मागील पाच ते सहा दिवसांपासून सुरू असलेल्या संततधार पावसामुळे जनजीवन विस्कळीत झाले आहे . हवामान खात्याने शहर व जिल्ह्यात रेड अलर्ट दिला असून , प्रशासन सतर्क झाले आहे . या पार्श्वभूमीवर २० जुलै रोजी होणारी शिष्यवृत्ती परीक्षा पुढे ढकलण्यात आली आहे . आता ही परीक्षा ३१ जुलै रोजी घेण्यात येणार असल्याची माहिती महापालिकेच्या प्रशासन अधिकारी सुनीता धनगर यांनी दिली . पूर्व उच्च प्राथमिक शिष्यवृत्ती परीक्षा ( ५ वी ) आणि पूर्व माध्यमिक शिष्यवृत्ती परीक्षा ( ८ वी ) पाच दिवसांनी होणार होती . मात्र , सध्याची परिस्थिती पाहता ही परीक्षा पुढे ढकलण्यात आली आहे . जिल्ह्यात होत असलेल्या अतिवृष्टीमुळे उद्भवलेली पूरसदृश स्थिती व बहुतांश ठिकाणी भूस्खलनामूळे वाहतूक बंद झाली आहे . या सर्व परिस्थितीमुळे विद्यार्थ्यांना विविध अडचणींना सामोरे जावे लागत आहे . त्यामुळे सुरक्षेचा विचार करून या परीक्षा ( दि . ३१ ) घेण्यात येणार आहे . यापूर्वी निर्गमित करण्यात आलेले प्रवेशपत्र दिनांक ३१ जुलै रोजी ग्राह्य धरण्यात येईल , असे त्यांनी सांगितले .