वीसहून अधिक बांधकामांवर कारवाई
नाशिक : प्रतिनिधी
नाशिक महापालिका प्रशासनाने पुन्हा एकदा बुधवारी (दि. 24)अनधिकृत बांधकाम जमीनदोस्त केले. यात कोथमिरे लॉन्स, ड्रिम लॉन्स, गोल्डन प्रॉपर्टीज, दमदार स्क्रॅप सेंटर, चिकन व मटण दुकाने, अनधिकृत टपर्या तसेच 18 ते 20 शेड्सवर बुलडोझर चालवून अतिक्रमणे हटविण्यात आली. सुमारे 150 पोलिसांच्या कडेकोट बंदोबस्तात ही मोहीम पार पडली.
ही कारवाई यशस्वी करण्यासाठी अतिक्रमण विभागाचे पथक समन्वयक जीवन ठाकरे, अनिल लोहकरे, प्रवीण बागूल, विद्युत विभागाचे राजू झोळेकर, एनडीएस विभागीय पथक प्रमुख अविनाश पाटील व त्यांच्या सहकार्यांसह मक्तेदाराकडील साठ कर्मचारी सहभागी झाले होते. कायदा व सुव्यवस्था अबाधित राहावी यासाठी पोलिस मुख्यालयाकडून पोलिस उपायुक्त मोनिका राऊत, भद्रकाली पोलिस ठाण्याचे वरिष्ठ पोलिस निरीक्षक राकेश चौधरी, म्हसरूळ पोलिस ठाण्याचे वरिष्ठ पोलिस निरीक्षक सोहन माचवे, मुंबई नाका पोलिस ठाण्याचे वरिष्ठ पोलिस निरीक्षक अविनाश देशमुख, सहाय्यक पोलिस आयुक्त सुधाकर सुराडकर यांच्यासह जवळपास 150 पोलिसांचा बंदोबस्त तैनात केला होता. महापालिकेच्या या धडक कारवाईमुळे वडाळा शिवारातील अनधिकृत व्यावसायिक बांधकामांवर मोठा परिणाम झाला आहे. आगामी काळात शहरातील इतर भागांतही अशाच स्वरूपाच्या कारवाया सुरू राहणार असल्याचे प्रशासनाने स्पष्ट केले आहे.
महापालिका आयुक्त मनीषा खत्री यांच्या आदेशानुसार अतिक्रमण विभागाच्या उपायुक्त सुवर्णा दखणे यांच्या नेतृत्वाखाली ही धडक कारवाई करण्यात आली. यावेळी नाशिक पूर्व विभागीय अधिकारी हेमंत झुटे, नाशिक पश्चिम विभागीय अधिकारी चंदन घुगे, नगरनियोजन विभागाचे शाखा अभियंता प्रवीण थोरात, विनायक जाधव, गुणवंत वाघ आदी अधिकारी उपस्थित होते.
महापालिकेच्या नगरनियोजन विभागाने संबंधित व्यावसायिक व अतिक्रमणधारकांना यापूर्वी अनेक वेळा नोटिसा बजावल्या होत्या. अतिक्रमणे स्वतःहून हटविण्याच्या सूचना देण्यात आल्या होत्या. मात्र, नोटिसांकडे दुर्लक्ष करून अनधिकृत बांधकामे कायम ठेवल्याने प्रशासनाने अखेर कारवाईचा बडगा उगारला. सकाळपासून यंत्रसामग्री व कर्मचारी घटनास्थळी दाखल झाले होते. त्यानंतर एकामागोमाग एक अनधिकृत बांधकामे हटविण्याची प्रक्रिया सुरू केली. यादरम्यान कोथमिरे लॉन्स, ड्रिम लॉन्स, गोल्डन प्रॉपर्टीज परिसरातील विविध बांधकामे, दमदार स्क्रॅप सेंटरमधील अनधिकृत शेड्स, तसेच रस्त्यालगतच्या टपर्या व व्यावसायिक वापरासाठी उभारलेल्या पत्र्याच्या शेड्स हटविण्यात आल्या. काहींनी साहित्य काढण्यासाठी वेळ मागितला.
Sledgehammer comes down on unauthorized construction.