दोन वाहनांच्या भीषण अपघातात शिक्षिकेचा मृत्यू; मुलगा गंभीर

सिन्नर : प्रतिनिधी
तालुक्यातील बारागावपिंप्री शिवारात दोन कारची समोरासमोर धडक होऊन देशवंडी जिल्हा परिषद शाळेच्या शिक्षिका भीमाबाई छगनदास बैरागी (48) यांचा मृत्यू झाला. ही घटना रविवारी (दि.8) सकाळी सुमारे 11.45 वाजेच्या सुमारास घडली. या अपघातात त्यांचा नऊ वर्षीय मुलगा वरद मनोज बैरागी गंभीर जखमी झाला असून, त्याच्यावर खासगी रुग्णालयात उपचार सुरू आहेत.
भीमाबाई बैरागी या आपल्या मुलगा वरदला सोबत घेऊन अल्टो कार (क्र. एमएच 15 जीएल 5197)ने सुळेवाडी फाटामार्गे देशवंडीकडे जात होत्या. बारागावपिंप्री शिवारातील ज्ञानेश्वर गोराडे यांच्या शेताजवळ समोरून येणार्‍या स्विफ्ट कार (क्र. एचएच 01 बीजी 4004)ने त्यांच्या कारला जोरदार धडक दिली. या भीषण अपघातात बैरागी व त्यांचा मुलगा वरद यांच्या डोक्याला गंभीर दुखापत झाली.
अपघातानंतर स्थानिकांनी तातडीने मदत करत दोघांना जवळच्या रुग्णालयात दाखल केले. मात्र, उपचार सुरू होण्यापूर्वीच भीमाबाई बैरागी यांचा मृत्यू झाला. वरदच्या डोक्याला जबर मार लागल्याने त्याची प्रकृती चिंताजनक असल्याचे सांगण्यात येत आहे.
दरम्यान, अपघातानंतर स्विफ्ट कारचा चालक घटनास्थळावरून पसार झाला. याप्रकरणी कृष्णदास छगनदास बैरागी (35) यांच्या फिर्यादीवरून एमआयडीसी पोलिस ठाण्यात कारचालकाविरोधात गुन्हा दाखल करण्यात आला आहे. पुढील तपास हवालदार वाघ करीत आहेत. भीमाबाई बैरागी या ब्राह्मणवाडे केंद्रातील देशवंडी शाळेत शिक्षिका म्हणून कार्यरत होत्या. त्यांच्या अकस्मात निधनाने शाळेतील विद्यार्थी, शिक्षक, पालक व ग्रामस्थांमध्ये हळहळ व्यक्त
होत आहे.

Teacher dies in horrific two-vehicle accident; son critically injured