पाडळी फाट्याजवळील अपघातात तिघे जखमी

महामार्गाच्या कामामुळे घटना; कारचे नुकसान

मुकणे : प्रतिनिधी
मुंबईकडून नाशिककडे रात्री सव्वादोनच्या सुमारा जाणार्‍या सियाज कार (एमएच 15, एफएफ 0569) महामार्गाच्या सुरू असलेल्या कामाचा अंदाज न आल्याने पाडळी फाट्याजवळ खड्ड्यात जाऊन आदळली. कारने तीन पलट्या घेतल्याने तीन जणांना गंभीर दुखापत झाली. कारचाही चक्काचूर झाला.
घटनेचे वृत्त समजताच जगद्गुरू रामानंदाचार्य नरेंद्राचार्य संस्थानच्या रुग्णवाहिकेचे चालक निवृत्ती गुंड यांनी तत्काळ घटनास्थळी धाव घेत जखमी झालेले विनायक विष्णू गांगुर्डे (वय 22), आदित्य नीलेश लायले (वय 21, रा. नाशिक, स्मित समीर माघाय (वय 32, रा. लासलगाव) यांना नाशिक येथील खासगी रुग्णालयात दाखल केले. दरम्यान, महामार्गाच्या सुरू असलेल्या कामालगत कोणतेही सूचनाफलक, दिशादर्शक किंवा उपाययोजना केलेली नसल्याने अपघातांना निमंत्रण मिळत आहे. यावर संबंधित काम करणारी यंत्रणा किंवा संबंधित राष्ट्रीय राजमार्ग प्राधिकरण विभागाचे लक्ष नसल्याचा आरोप वाहनधारकांनी केला आहे.