रुग्णालय प्रशासनाचा निष्काळजीपणा उघड
अमरावती : प्रतिनिधी
अमरावती येथील जिल्हा स्त्री रुग्णालय (डफरिन हॉस्पिटल)च्या नवीन इमारतीतील नवजात शिशू अतिदक्षता विभागात सोमवारी पहाटेच्या सुमारास अचानक आग लागून तीन नवजात बालकांचा दुर्दैवी मृत्यू झाला. ही दुर्घटना पहाटे 3.15 च्या सुमारास घडली आहे. तिसर्‍या मजल्यावरील नवजात अतिदक्षता कक्षातील (एनआयसीयू) व्हेंटिलेटरमध्ये शॉर्टसर्किट होऊन स्फोट झाल्याची प्राथमिक माहिती समोर आली आहे. या भीषण आगीत धुरामुळे गुदमरून तीन चिमुकल्यांना प्राण गमवावे लागले, ज्यामुळे संपूर्ण परिसरात हळहळ आणि संतापाची लाट उसळली आहे.
आग लागल्याचे लक्षात येताच ड्यूटीवर असलेल्या डॉक्टर, परिचारिका आणि रुग्णालयातील कर्मचार्‍यांनी तातडीने बचावकार्य सुरू केले. त्यांनी स्वतःच्या जीवाची पर्वा न करता कक्षात अडकलेल्या एकूण 39 बालकांपैकी 36 नवजात बालकांना सुरक्षितपणे बाहेर काढण्यात यश मिळवले. यातील सहा बालकांच्या हाता-पायाला भाजल्याने त्यांना पुढील उपचारांसाठी त्वरित सुपर स्पेशालिटी रुग्णालयात दाखल करण्यात आले आहे. या बचावकार्यामुळे मोठी जीवितहानी टळली असली, तरी या दुर्घटनेमुळे नवजात अतिदक्षता विभागाच्या अग्निसुरक्षा व्यवस्थेवर आणि रुग्णालयाच्या प्रशासनावर मोठे प्रश्नचिन्ह निर्माण झाले आहे.
या दुर्घटनेनंतर राजकीय वर्तुळातून तीव्र प्रतिक्रिया उमटण्यास सुरुवात झाली आहे. मुख्यमंत्री देवेंद्र फडणवीस यांनी या दुर्घटनेवर तीव्र दुःख व्यक्त करत उच्चस्तरीय चौकशीचे आदेश दिले आहेत. तसेच मृतांच्या कुटुंबीयांना प्रत्येकी पाच लाख रुपयांची आर्थिक मदत देण्याची घोषणा त्यांनी केली.जखमी बालकांवरील उपचारांचा सर्व खर्च राज्य सरकार करेल, असेही त्यांनी स्पष्ट केले. या घटनेतील दोषींवर कठोर कारवाई केली जाईल, असे आश्वासन मुख्यमंत्र्यांनी दिले आहे.
राज्याचे आरोग्यमंत्री आणि सचिव यांना अमरावतीला भेट देऊन परिस्थितीचा आढावा घेण्याचे
निर्देशही देण्यात आले आहेत. दुसरीकडे, विरोधी पक्षांनी या घटनेवरून राज्य सरकार आणि आरोग्य यंत्रणेवर जोरदार टीकास्र सोडले आहे. राष्ट्रवादी काँग्रेसच्या खासदार सुप्रिया सुळे यांनी सरकारवर संताप व्यक्त करत, हा केवळ अपघात नाही, तर प्रशासकीय हलगर्जीपणाचा बळी आहे, असा घणाघाती आरोप केला. रुग्णालयातील अग्निशमन यंत्रणा कार्यान्वित का नव्हती आणि नवजात अतिदक्षता विभागासारख्या संवेदनशील ठिकाणी अशी दुर्घटना कशी घडू शकते, असा सवाल उपस्थित करत विरोधकांनी आरोग्यमंत्र्यांच्या राजीनाम्याची आणि सखोल चौकशीची मागणी केली आहे.
Three newborns die in a fire in Amravati.