आज मान्सून अंदमानात दाखल

नवी दिल्ली : गेल्या काही दिवसांपासून उष्णतेमुळे लाही लाही होत असताना आता दिलासा देणारी एक बातमी समोर आली आहे . भारतीय हवामान विभागाने दिलेल्या माहितीनुसार , यावर्षी नैऋत्य मान्सून देशात वेळेपूर्वी दाखल होऊ शकतो . अंदमान आणि निकोबार बेटांवर १५ मे रोजी पहिला हंगामी पाऊस पडण्याची शक्यता आहे . भारतीय हवामान विभागाच्या मते , नैऋत्य मान्सून १५ मे रोजी दक्षिण अंदमान समुद्र आणि आग्नेय बंगालच्या उपसागरात पोहोचण्याची शक्यता आहे . हवामान शास्त्रज्ञांच्या मते , पूर्व मान्सून सुरू होण्यासाठी अनुकूल परिस्थिती निर्माण झाली असून , मान्सून आधी केरळ आणि नंतर उत्तरेकडे सरकेल . केरळमध्ये मान्सून साधारणपणे १ जून रोजी दाखल होतो . परंतु , यंदा वेळेआधी म्हणजे २७ मे रोजी केरळात मान्सूनचं आगमन होणार असल्याची माहिती भारतीय हवामान खात्याने दिली आहे . पोषक वातावरण राहिल्यास पुढच्या सात दिवसांत मान्सून महाराष्ट्रात येऊन धडकणार आहे . अंदमान आणि निकोबार बेटांवर पुढील पाच दिवस हलका ते मध्यम स्वरूपाचा पाऊस पडेल , असा हवामान खात्याचा अंदाज आहे . १४ ते १६ मेदरम्यान द्वीपसमूहात काही ठिकाणी मुसळधार पावसाची शक्यता आहे . आज मान्सून अंदमानात दाखल १५ आणि १६ मे रोजी दक्षिण अंदमान समुद्रावर ४० ते ६० किमी प्रतितास वेगाने वाऱ्याची शक्यता आहे . दरम्यान , काही राज्यांमध्ये पुढील दोन दिवस उष्णतेच्या लाटेबाबत अलर्ट जारी करण्यात आला आहे .

देशात ७० टक्के पाऊस

साधारणपणे मान्सूनची सुरुवात केरळपासून होते आणि नंतर तो हळूहळू देशभर पसरतो . त्यामुळे देशातील एकूण पावसापैकी ७० टक्के पाऊस नैऋत्य मान्सूनमधून पडतो . भारतातील निम्मी रब्बी पिके या मान्सूनवर अवलंबून आहेत .