नाशिकरोड परिसरात बेमोसमी पावसाची हजेरी

चाकरमान्यांना करावा लागला विविध अडचणींचा सामना

नाशिकरोड : प्रतिनिधी
नाशिकरोड परिसरात शुक्रवारी (दि. 9) सायंकाळपासून पुन्हा एकदा बेमोसमी पावसाने जोरदार हजेरी लावली. सुमारे दीड ते दोन तास सुरू असलेल्या संततधारेमुळे रस्ते जलमय झाले आहेत. कामावरून घरी परतणार्‍या चाकरमान्यांना व रस्त्यावर व्यवसाय करणार्‍या विक्रेत्यांना मोठ्या अडचणींना सामोरे जावे लागले.
पावसाच्या सुरुवातीसच महावितरणचा नेहमीचा कारनामा पुन्हा समोर आला. पावसासोबतच वीजपुरवठा खंडित झाला आणि सुमारे दोन तास परिसर अंधारात गेला. यामुळे रस्त्यांवर वाहतुकीस अडथळा निर्माण झाला तर काही ठिकाणी ब्लॅकआउटची परिस्थिती उद्भवली.
गेल्या तीन दिवसांपासून नाशिकरोड परिसरात बेमोसमी पाऊस कोसळत आहे. दोन दिवसांपूर्वी जोरदार वार्‍यांमुळे अनेक झाडे कोसळली. परिणामी 12 ते 14 तास वीजपुरवठा ठप्प राहिला होता. गुरुवारी (दि. 8) दिवसभर उघडीप मिळाल्यानंतर शुक्रवारी (दि. 9)सायंकाळी सातनंतर पुन्हा पावसाला सुरुवात झाली आणि आठ वाजेनंतर त्यात अधिकच जोर आला.
या पावसामुळे रस्त्यांवर ठिकठिकाणी पाणी साचले असून, वाहतुकीस अडथळा निर्माण झाला आहे. चाकरमानी व कामगारांना भिजतच घर गाठावे लागले.