वडाळागावातील खंडोबा चौकात किराणा दुकानदारावर कोयत्याने हल्ला

सिडको : विशेष प्रतिनिधी
वडाळागाव येथील खंडोबा चौक परिसरात एका किराणा दुकानदारावर सात जणांच्या टोळीने कोयत्याने हल्ला करून ठार मारण्याचा प्रयत्न केल्याची गंभीर घटना घडली. या प्रकरणी इंदिरानगर पोलीस ठाण्यात गंभीर गुन्ह्यांची नोंद करण्यात आली आहे
आलम मकसूद खान (वय 30, रा. खंडोबा चौक, वडाळागाव) असे हल्ल्यात जखमी झालेल्या व्यक्तीचे नाव आहे. फिर्यादी आलम खान यांच्या म्हणण्यानुसार आरोपी तौसिफ, जावेद बाबा, सोनू व चार ते पाच अनोळखी इसम यांनी मोटारसायकलवर येत त्यांना दुकानाबाहेर बोलावले. त्यानंतर आरोपींपैकी एकाने कोयत्याने त्यांच्या अंगावर वार करत त्यांना ठार मारण्याचा प्रयत्न केला. या हल्ल्यात आलम खान थोडक्यात बचावले असून, त्यांनी तत्काळ इंदिरानगर पोलीस ठाण्यात धाव घेऊन तक्रार दाखल केली. या तक्रारीवरून इंदिरानगर पोलीस ठाण्यात गुन्हा दाखल करण्यात आला असून पुढील तपास सहाय्यक पोलीस निरीक्षक अंकोलीकर यांच्या मार्गदर्शनाखाली सुरू आहे.