गोदा आरतीतून मतदार जनजागृती; एक दिवा मतदानासाठी उपक्रम

नाशिक : प्रतिनिधी
नाशिक महापालिका सार्वत्रिक निवडणूक- 2025 च्या अनुषंगाने मतदार जनजागृती अभियानांंतर्गत गोदावरी नदीकिनारी रामकुंडावर सायंकाळी गोदा आरतीच्या निमित्ताने हजारो भाविकांना मतदानाची प्रतिज्ञा देण्यात आली.
मतदानाची टक्केवारी वाढविण्याच्या दृष्टीने राबविण्यात येत असलेल्या या अभिनव उपक्रमात गोदा आरतीसाठी मोठ्या संख्येने उपस्थित असलेल्या भाविकांनी उत्स्फूर्त सहभाग नोंदविला. नाशिक महापालिकेच्या आयुक्त तथा प्रशासक मनीषा खत्री यांच्या मार्गदर्शनाखाली ही मतदार जनजागृती प्रतिज्ञा देण्यात आली. यावेळी उपस्थित नागरिकांनी आपल्या मोबाइलचे टॉर्च सुरू करून मतदार जनजागृती अभियानाला प्रतीकात्मक पाठिंबा दर्शविला. रामकुंड, रामतीर्थ परिसरात नाशिक महापालिकेचे बोधचिन्ह, राज्य निवडणूक आयोगाचे बोधचिन्ह व मतदार जनजागृती अभियानाचे बोधचिन्ह रांगोळीच्या माध्यमातून साकारण्यात येऊन नागरिकांचे लक्ष वेधण्यात आले. व्होट कर नाशिककर, कर मतदान- सांगतंय संविधान, मतदान सर्वश्रेष्ठ दान, अशा घोषणांनी संपूर्ण रामकुंड परिसर दुमदुमून गेला. यावेळी गोदावरी नदीत दिवे प्रज्वलित करून एक दिवा मतदानासाठी हे विशेष अभियानही राबविण्यात आले.
या कार्यक्रमास महापालिकेचे अतिरिक्त आयुक्त प्रदीप चौधरी, उपायुक्त लक्ष्मीकांत साताळकर, उपायुक्त संगीता नांदूरकर, शिक्षणाधिकारी डॉ. मिता चौधरी यांनी उपस्थित राहून मतदार प्रतिज्ञा घेतली. या प्रतिज्ञेचे वाचन जनसंपर्क अधिकारी योगेश कमोद यांनी केले. रामतीर्थ गोदावरी सेवा समितीच्या पदाधिकार्‍यांनीही उपस्थित नाशिककरांना प्रत्येक नागरिकाने मतदान करण्याचे आवाहन केले.

Voter awareness through Goda Aarti; Initiative for One Day Voting