वाढत्या थंडीमुळे उबदार कपड्यांचा बाजार गरम

तरुणाईकडून फॅशनेबल स्वेटरला वाढती मागणी

नाशिक : प्रतिनिधी
शहरात थंडीचा कडाका वाढला आहे. किमान तापमान 9 अंशांपर्यंत घसरले आहे. त्यामुळे थंडीपासून बचावासाठी नागरिकांकडून गरम कपड्यांच्या खरेदीला प्राधान्य देण्यात येत आहे. हिवाळ्यासाठी बाजारपेठेतही नवीन प्रकारचे विविध स्वेटर, जॅकेट विक्रीसाठी आले आहेत. थंडीपासून संरक्षणासाठी गरम कपड्यांच्या खरेदीसाठी नागरिकांची बाजारपेठेत गर्दी होत आहे.
गेल्या काही वर्षांत हिवाळ्याच्या काळात तरुणाईकडून फॅशनेबल कपड्यांचा वापर थंडीपासून बचावासाठी करण्यात येत आहे. स्टेटमेंट म्हणूनदेखील अनेक जण विविध प्रकारचे स्वेटर, जॅकेट, मफलर, स्वेट शर्ट यांचा वापर करत असल्याचे चित्र आहे.
थंडीपासून बचावासाठी नव्हे, तर इतरांपेक्षा आपण वेगळे दिसावे म्हणून तरुणींकडून फॅशनेबल उबदार कपड्यांना अधिक पसंती दिली जात आहे. ज्येष्ठ नागरिकांसाठी हाफ स्वेटर, मफलर, कानटोपी, कानपट्टी यांचा समावेश आहे. तरुणाांठी जॅकेट झिपर, प्रिंटेंड मंकीकॅप, हँडग्लोव्हज विक्रीसाठी आले आहेत.

पुरुष ः

स्वेट शर्ट- 800 ते 1000 रुपये
ट्रेंडी हुडी- 900 ते 1200 रुपये
वूलन स्वेटर- 1200 रु.पासून
बायकर जॅकेट-1700 रु.पासून
कार्गो जॅकेट-2000 रु.पासून

महिला ः

स्वेटर- 800 ते 1500 रु.
फॅशनेबल स्वेटर-1500-2000
लेदर जॅकेट- 200 रु.पासून
स्टोल/शाल- 200 ते 400 रु.
हातमोजे- 150 रुपयांपासून

ऑनलाइन शॉपिंगला पसंती

सध्या बाजारपेठेत जाऊन खरेदी करण्याबरोबर ऑनलाइन शॉपिंगला पसंती देण्यात येत आहे. ऑनलाइन शॉपिंग वेबसाइटनेही आपल्या वेबसाइटवर ग्राहकांना स्वेटर उपलब्ध करून दिले आहेत. पुरुष, महिला व लहान मुलांसाठी ऑनलाइन स्वेटर विक्रीसाठी वेबसाइटने उपलब्ध करून दिले आहेत.

थंडी वाढल्याने उबदार कपड्यांना मोठी मागणी आहे. महिला व लहान मुलांच्या स्वेटरला अधिक मागणी आहे. जॅकेट, मफलरचीही विक्री हळूहळू वाढत आहे. अजून थंडी वाढली की खरेदीदेखील वाढणार आहे. किंमतीमध्ये गतवर्षीपेक्षा 5 ते 10 टक्के वाढ झाली आहे.
– रमेश खैरे, स्वेटर विक्रेता