चोरट्यांचा अफलातून कारनामा, नांदूरशिंगोटेसह पाच गावांचा पाणीपुरवठा बंद
सिन्नर : प्रतिनिधी
कणकोरीसह पाच गावांना पाणीपुरवठा करणार्‍या भोजापूर धरणावरील मुख्य ट्रान्स्फॉर्मरची गुरुवारी मध्यरात्री चोरट्यांनी साफ लूट केली. विद्युत पुरवठा बंद करून चोरट्यांनी ट्रान्स्फॉर्मर खाली उतरवला आणि त्यातील सर्व तांब्याच्या कॉइल्स, बुशिंग, ऑइल, कोर यांसह लाखोंचे साहित्य काढून पोबारा केला. सकाळी जागेवर फक्त रिकामा लोखंडी बॉक्स उभा असल्याचे पाहून पाणीपुरवठ्याचा विद्युत पंप सुरू करण्यासाठी गेलेल्या कर्मचार्‍यांच्या पायाखालची जमीन सरकली.
भोजापूर धरणातून नांदूरशिंगोटे, कणकोरी व पाचगाव परिसराला पिण्याचे पाणी उचलले जाते. यासाठी खास ट्रान्स्फॉर्मर बसवण्यात आला होता. मात्र, गुरुवारी रात्रीच चोरट्यांनी या भागातील लाईन बंद करून शांतपणे ट्रान्स्फॉर्मर उचलला आणि आतलं सर्व किमती साहित्य लंपास केले. शुक्रवारी सकाळी पाणीपुरवठा योजनेतील कामगार कामावर आल्यावर त्यांना हा प्रकार लक्षात आला. त्यांनी तत्काळ ग्रामपंचायतीला माहिती दिली. कळताच ग्रामविस्तार अधिकारी जीवन सावकार व कर्मचारी धरणावर पोहोचले. जागेची पाहणी करत पंचनामा करण्यात आला. पोलिसांत गुन्हा दाखल करण्याचे काम रात्री उशिरापर्यंत सुरू होते.
ग्रामस्थांना कर भरून सहकार्य करण्याचे आवाहन
ट्रान्स्फॉर्मरमधील साहित्य चोरी झाल्यामुळे पाणीपुरवठा काही दिवस अडचणीत राहणार आहे. नवा ट्रान्स्फॉर्मर बसवण्यासाठी साडेतीन लाखांचा खर्च येणार असून, तो ग्रामपंचायत आणि पाणीपुरवठा समितीला करावा लागेल. त्यामुळे ज्यांची घरपट्टी आणि पाणीपट्टी थकली आहे, त्यांनी तातडीने कर भरून ग्रामपंचायतीला सहकार्य करावे. – शोभा बर्के, सरपंच, नांदूरशिंगोटे ग्रामपंचायत