काय हवे तुला?

काय हवे तुला
विचारले का कोणी तिला?
जिला माहित असतं
काय हवय सर्वांना…

मनापासून अगदी
ती विचारपूस करते सर्वांची,
दुखलं -खूपलं कोणाचं
तर काळजी घेते सगळ्यांची..

डॉक्टर असो की कुणी अधिकारी
शिक्षिका असो की अभियंता,
नोकरी – घर समतोल साधून
सगळ्याचीच करते चिंता..

थकून भागून घरी आली तरी
थेट स्वयंपाक घरात घुसणार,
कुटुंबीयांचं पोट भरल्यावर तिच्या
चेहऱ्यावर समाधान दिसणार…

आजी ,मावशी ,आत्या, बायको,
बहिण, मैत्रीण, मुलगी वा सून,
असो कोणत्याही रूपात ती
कर्तव्य पालन तिचे येते दिसून…

कधीही घेत नाही माघार
कुठलीही जबाबदारी पार पाडताना,
पण पाहिलंच नाही कधी तिला
आपल्या इच्छा मांडताना..

जमेल का कुणाला
तिचे मन ओळखायला?
विचारेल का कुणी तिला
काय हवे आहे तुला?

महिला दिनानिमित्त आपल्या कुटुंबातील सर्व महिलांचा विचार नक्कीच करून बघा आणि विचारायला विसरू नका…
काय हवे तुला?
—–राखी खटोड

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.