महावितरणतर्फे शून्य थकबाकी मोहीम

100 टक्के वसुली करण्याचे संचालक राजेंद्र पवार यांचे निर्देश

♦ शहरात आढावा बैठक.
♦ मार्चएंडपर्यंत वसुलीचे उद्दिष्ट.
♦ वीजबिल न भरल्यास जोडणी होणार कट.

नाशिक : प्रतिनिधी
महावितरणच्या आर्थिक सक्षमतेसाठी ग्राहकांना पुरवलेल्या प्रत्येक युनिटचा मोबदला मिळणे अनिवार्य आहे. त्याअनुषंगाने मार्चअखेर सर्व वर्गवारीतील ग्राहकांकडील थकीत व चालू वीज देयकांची 100 टक्के वसुली करण्यासाठी मार्च मिशनअंतर्गत शून्य थकबाकी मोहीम युद्धपातळीवर राबवावी, असे स्पष्ट निर्देश महावितरणचे संचालक (मानव संसाधन) राजेंद्र पवार यांनी विद्युत भवन येथे दिले.
नाशिक परिमंडळातील वसुली मोहिमेचा आढावा घेण्यासाठी मुख्य अभियंत्यांंच्या दालनात बैठक घेण्यात आली होती. बैठकीत नाशिक मंडळातील घरगुती, औद्योगिक, वाणिज्यिक व इतर सर्व वर्गवारीतील थकबाकीचा सविस्तर आढावा घेतल्यानंतर ते बोलत होते.
मार्च संपण्यास अवघे दोन दिवस शिल्लक असल्याने मार्च मिशनअंतर्गत सर्व देयके वसूल करून शून्य थकबाकीचे लक्ष्य गाठण्यासाठी सर्वांनी कसोशीने प्रयत्न करावेत. वारंवार आवाहन करूनही वीज देयकांचा भरणा न करणार्‍या ग्राहकांचा वीजपुरवठा नियमानुसार खंडित करण्याचे आदेश देण्यात आले आहेत.
या बैठकीला नाशिक परिमंडळाचे मुख्य अभियंता सुंदर लटपटे, पायाभूत आराखडा मंडळाचे अधीक्षक अभियंता देवेंद्र सायनेकर, अधीक्षक अभियंता राजेश थूल, तसेच शहरातील कार्यकारी अभियंते, अतिरिक्त कार्यकारी अभियंते व नाशिक परिमंडळातील वरिष्ठ अधिकारी उपस्थित होते.

या मोहिमेत उल्लेखनीय कामगिरी करणार्‍या अधिकारी व कर्मचार्‍यांचा सन्मान करण्यात येईल. मात्र, वसुलीच्या कामात हलगर्जीपणा किंवा दुर्लक्ष करणार्‍यांवर कडक प्रशासकीय कारवाई केली जाईल, असा इशाराही संचालक पवार यांनी दिला. थकबाकी वसुलीच्या कामासाठी अभियंते व कर्मचार्‍यांनी कार्यालयात वेळेत उपस्थित राहून दैनंदिन कामाचे सूक्ष्म नियोजन करावे, अशा सूचनाही त्यांनी दिल्या.

Zero arrears campaign by Mahavitaran

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.