आरटीओ आणि वाहतूक पोलिसांची संयुक्त मोहीम
पंचवटी : प्रतिनिधी
मद्यपान करून वाहन चालविणार्‍यांविरोधात प्रादेशिक परिवहन कार्यालय, नाशिक आणि शहरातील विविध पोलीस ठाण्यांच्या वाहतूक शाखेतर्फे दर शनिवार व रविवारी विशेष मोहीम राबविण्यात येत आहे. या मोहिमेंतर्गत मद्यप्राशन करून वाहन चालविणार्‍या चालकांवर कठोर कारवाई करण्यात येत असून, आतापर्यंत न्यायालयात दोष सिद्ध झालेल्या 40 चालकांना शिक्षा सुनावण्यात आली आहे. यामध्ये 10 हजार रुपये दंड किंवा तीन महिन्यांच्या कारावासाची शिक्षा समाविष्ट आहे.
मद्यपान करून वाहन चालविणे हे स्वतःच्या तसेच रस्त्यावरील अन्य नागरिकांच्या जीवितासाठी धोकादायक ठरू शकते. त्यामुळे नागरिकांनी मद्यप्राशन केल्यानंतर कोणत्याही परिस्थितीत वाहन चालवू नये, असे आवाहन प्रादेशिक परिवहन कार्यालयाकडून करण्यात आले आहे. या मोहिमेदरम्यान दाखल करण्यात आलेल्या प्रकरणांमध्ये दोष सिद्ध होण्याचे प्रमाण वाढत असल्याने न्यायालयाकडूनही अशा प्रकरणांमध्ये कठोर दंडात्मक कारवाई केली जात आहे. न्यायालयीन कारवाईचे गांभीर्य लक्षात घेऊन वाहनचालकांनी वाहतुकीच्या नियमांचे पालन करावे आणि मद्यप्राशन करून वाहन चालविणे टाळावे, असे आवाहन करण्यात आले आहे.
प्रादेशिक परिवहन अधिकारी प्रदीप शिंदे यांच्या मार्गदर्शनाखाली आणि सहायक प्रादेशिक परिवहन अधिकारी सचिन बोधले यांच्या आदेशानुसार ही मोहीम राबविण्यात येत आहे. मोटार वाहन निरीक्षक अभिजित वाघमारे, मनीष देवरे, उमेश बेडसे आणि श्रीकांत मंडलिक यांच्यासह शहरातील विविध वाहतूक विभागांचे पोलीस अधिकारी व कर्मचारी या कारवाईत सहभागी झाले आहेत. या कारवाईमुळे वाहनधारकांमध्ये खळबळ
उडाली आहे.
मद्यपान करून वाहन चालवल्यास कारवाई
वाहनचालकांनी नियमांचे पालन करून स्वतःचे आणि इतरांचे प्राण सुरक्षित ठेवावेत. मद्यप्राशन करून वाहन चालविल्यास कायदेशीर कारवाईला सामोरे जावे लागू शकते, याची प्रत्येकाने जाणीव ठेवावी.
– प्रदीप शिंदे, प्रादेशिक परिवहन अधिकारी, नाशिक
40 drivers penalized in drunk driving cases; crackdown intensifies in Nashik.