पंचवटी : प्रतिनिधी
नशामुक्त नाशिक अभियानांतर्गत अमली पदार्थविरोधी पथकाने पंचवटी परिसरात कारवाई करत राजस्थान येथील एका गॅस रिपेअरिंग कामगाराकडून तब्बल 51 किलो 73 ग्रॅम डोडा
(अफूची बोंडे व चुरा) जप्त केला. या कारवाईत अमली पदार्थासह एकूण 8 लाख 83 हजार 495 रुपयांचा मुद्देमाल जप्त करण्यात आला आहे.
पोलीस आयुक्त संदीप कर्णिक यांच्या आदेशानुसार शहरातील अमली पदार्थांच्या अवैध विक्रीविरोधात विशेष मोहीम सुरू आहे. त्याअंतर्गत 8 जुलै रोजी अमली पदार्थविरोधी पथकाचे प्रभारी अधिकारी सहायक पोलीस निरीक्षक सचिन चौधरी यांना गुप्त माहिती मिळाली की, राजस्थान येथील एक व्यक्ती पंचवटीतील दत्तनगर, पेठ रोड परिसरातील राहत्या घरी विक्रीसाठी डोडा चुरा घेऊन आला आहे. या माहितीच्या आधारे अमली पदार्थविरोधी पथकाने सापळा रचून संबंधिताच्या घरावर छापा टाकला. झडतीदरम्यान 51 किलो 73 ग्रॅम वजनाचा डोडा (अफूची बोंडे व चुरा) हस्तगत करण्यात आला.
अटक करण्यात आलेल्या संशयिताने आपले नाव सुभाष मंगळाराम बिष्णोई (वय 42, मूळ रा. इसरवालोकी ठाणी, चिराई, ता. तिवरी, जि. जोधपूर, राजस्थान) असे सांगितले. तो गेल्या दहा वर्षांपासून पंचवटी परिसरात वास्तव्यास असून, गॅस रिपेअरिंगचे काम करीत असल्याची माहिती पोलिसांनी दिली.
या प्रकरणी पंचवटी पोलीस ठाण्यात अमली पदार्थ प्रतिबंधक कायदा (एनडीपीएस) अंतर्गत गुन्हा दाखल करण्यात आला असून, जप्त अमली पदार्थाचा स्रोत, पुरवठा साखळी आणि इतर संबंधित आरोपींचा शोध घेण्यासाठी पुढील तपास सुरू आहे. ही कारवाई प्रभारी अधिकारी सहायक पोलीस निरीक्षक सचिन चौधरी, वरिष्ठ पोलीस उपनिरीक्षक रंजन बेंडाळे, पोलीस हवालदार भरत डांगळे, बळवंत कोल्हे, संतोष सौंदाणे, पोलीस अंमलदार योगेश सानप, चंद्रकांत बागडे, अविनाश
फुलपगारे, महिला पोलीस अंमलदार अर्चना भड तसेच पंचवटी पोलीस ठाण्याचे सहायक पोलीस निरीक्षक सतीश शिरसाठ व त्यांच्या गुन्हे शोध पथकाने संयुक्तपणे केली.
51 kg of poppy straw seized from a gas repair worker from Rajasthan.