नाशिक कृषी उत्पन्न बाजार समितीच्या दिंडोरी रोडवरील मुख्य प्रवेशद्वाराच्या जवळच असलेल्या ढाप्यावर ठेवलेले लाकडाचे खोके.
पंचवटी : प्रतिनिधी
नाशिक कृषी उत्पन्न बाजारच्या दिंडोरी रोडवरील मुख्य प्रवेशद्वाराच्या जवळच असलेल्या तुटलेल्या ढाप्यावर बाजार समिती प्रशासनाने खोक्याचा उतारा दिला आहे. त्यामुळे बाजार समितीच्या आवारातील समस्यांकडे लक्ष आहे की नाही, असा प्रश्न उपस्थित केला जात आहे. नाशिक कृषी उत्पन्न बाजार समितीच्या आवारात जिल्ह्याच्या विविध भागातून चारचाकी वाहनांमधून पालेभाज्या, फळभाज्या विक्रीसाठी आणल्या जातात. तसेच लिलाव झाल्यानंतर याच बाजार समितीतून राज्याच्या विविध भागांत भाजीपाला पाठविण्यात येत असतो. त्यामुळे या आवारात अवजड वाहनांसह चारचाकी, रिक्षा, दुचाकींचा वावर असतो. रात्री उशिरापर्यंत बाजार समितीच्या आवारात पालेभाज्यांचे लिलाव होत असतात. परंतु याच बाजार समितीच्या आवारातील ढाप्यांची दुरवस्था झाल्याचे चित्र बघायला मिळत आहे. बाजार समितीच्या मुख्य प्रवेशद्वाराच्या जवळच असलेल्या चेंबरवरील ढापा तुटलेला असून, त्यावर मात्र बाजार समिती प्रशासनाने एक मोठे लाकडी खोके ठेवल्याचे चित्र बघायला मिळाले. जर याच ठिकाणाहून रात्रीच्या वेळी एखादे मोठे वाहन अथवा रिक्षा किंवा दुचाकी गेली तर अपघात होण्याची शक्यता नाकारता येत नाही. अशाच प्रकारे बाजार समितीच्या आवारातील अनेक ढापे तुटल्याचे चित्रदेखील बघायला मिळत असून, याकडे बाजार समिती प्रशासन अपघात झाल्यावर दखल घेणार का, असा प्रश्न यानिमित्ताने उपस्थित केला जात आहे.