नदी स्वच्छतेची मागणी
नाशिक : प्रतिनिधी
नाशिक व पंचवटीतील ऐतिहासिक आणि धार्मिक महत्त्व असलेल्या गोदावरी नदीपात्रात मोठ्या प्रमाणात पाणवेली व कचरा जमा झाला आहे. सिंहस्थ कुंभमेळा अवघ्या एक-दीड वर्षावर आलेला आहे. गोदावरी नदीवरील रामकुंड येथे सिंहस्थ कुंभमेळा स्नान पर्वणी होत असते. त्याच रामकुंडापासून अवघ्या 500 मीटरच्या अंतरावर अहिल्यादेवी होळकर पूल ते रामवाडी पुलाच्या दरम्यान गोदावरी नदीपात्रात अनेक महिन्यांपासून पाणवेली जमा झालेल्या आहेत. या ठिकाणी वेगवेगळ्या प्रकारचा कचराही जमा झालेला आहे. सद्यस्थितीत कुंभमेळ्याच्या निमित्ताने सरकार आणि प्रशासनाची तपोवनातील झाडे तोडून प्रदर्शन केंद्र उभारण्यासाठी जी तत्परता चालू आहे, ती मात्र गोदावरी स्वच्छ-निर्मळ करण्यासाठी दिसून येत नाही. नदी स्वच्छ-निर्मळ करण्याची मागणी नागरिकांनी केली आहे. काही दिवसांपूर्वी नाशिक महानगरपालिकेने स्वच्छ गोदा बॉण्डद्वारे 200 कोटी रुपये अवघ्या दोन तासांत मिळवले. पण त्या 200 कोटी रुपयांतून या गोदावरी नदीपात्र-किनारे साफसफाई-स्वच्छता-निर्मळ करण्यासाठी दोन रुपये पण खर्च केल्याचे दिसून येत नाही, तर मग हे 200 कोटी रुपये आलेले कधी आणि कसे खर्च करणार, हा नाशिककरांचा सरकारला आणि महानगरपालिका आयुक्तांना प्रश्न आहे. या प्रश्नाचे उत्तर कुंभमेळा मंत्री गिरीश महाजन आणि महापालिका आयुक्त मनीषा खत्री यांनी नाशिककरांना दिले पाहिजे, असे नागरिकांचे म्हणणे आहे.
The watercourses were covered with water lilies.